[A:125]
de rjes rgyal ba rin po che rab tu byung ba'i mtshan grags pa brtson 'grus te/ dbus su phebs nas rje spyan snga rin po ches byin gyis brlabs pas chos thams cad mnyam pa nyid kyi rtogs pa 'khrungs/ mkhas grub kyi yon tan phul du byon zhing / nam mkha' las thog babs pa sku chos su gtums pas rgyal sras thog rdugs pa zhes nus mthu'i snyan pa che/ gdan sar phebs nas sing gha gling ti ra hu ti ya rtse rgyal po rnams kyis rnam thos kyi bu la 'gran par nus pa'i mkho dgu'i yo byad bsam gyis mi khyab pa phul zhing / khyad par sog po rbad 'gyel du grags pa'i nor bu sogs nor sna'i rigs kyi mchod rdzas bod yul du gdan sa thel bzang bar grags pa yang 'di'i dus byung / spyan snga rin po che yan chad du gong ma'i 'ja' sa sogs med 'dug na'ang / 'di nyid kyi dus hu la hur gtogs pa rnams gong ma'i lung gi 'ja' sa dang bcas ldan ma sgom brtson gyis spyi dpon byas na'ang lugs dang 'brel bar ma byung bas/ dpon rdo rje dpal rkang bzhi'i dpon byed kyin yod pa rgyal ba rin po ches tshur bkug ste khri dpon du bskos/ gong sar lan gsum byon/ pho brang sgang / tshong 'dus brag kha/ sne'u gdong / sna mo/ ha la sgang / thang po che gling smad/ 'phyos gzhis ka/ mon mkhar bkra shis gdong / rgyal thang / lcags rtse gri khu/ mchod rten gling / chad dkar te gzhis ka bcu gnyis brtsigs/ mnga' thang shin tu mtho zhing / dpon rang yang mgo la sgom zhwa dang / lus la chos gos rnam gsum gyon/ btsun tshugs ma dor bas lugs gnyis thad nas kun gyis mtho bzos che/ 'khor rnams kyang 'chun che ba'i stabs kyis drag zhan mtha' dag gis dpon gyis gzigs sar bag yangs kyi spyod pa byed mi nus skad/ chos rje bsod grags pas/ bcu gnyis rin po che'i dus gong ma'i 'ja' sa byung ba dang / tshes bzhi pa'i dus dpon rdo rje rin cen gyis khri dpon byas