[A:༡༢༥]
དེ་རྗེས་རྒྱལ་བ་རིན་པོ་ཆེ་རབ་ཏུ་བྱུང་བའི་མཚན་གྲགས་པ་བརྩོན་འགྲུས་ཏེ། དབུས་སུ་ཕེབས་ནས་རྗེ་སྤྱན་སྔ་རིན་པོ་ཆེས་བྱིན་གྱིས་བརླབས་པས་ཆོས་ཐམས་ཅད་མཉམ་པ་ཉིད་ཀྱི་རྟོགས་པ་འཁྲུངས། མཁས་གྲུབ་ཀྱི་ཡོན་ཏན་ཕུལ་དུ་བྱོན་ཞིང་། ནམ་མཁའ་ལས་ཐོག་བབས་པ་སྐུ་ཆོས་སུ་གཏུམས་པས་རྒྱལ་སྲས་ཐོག་རྡུགས་པ་ཞེས་ནུས་མཐུའི་སྙན་པ་ཆེ། གདན་སར་ཕེབས་ནས་སིང་གྷ་གླིང་ཏི་ར་ཧུ་ཏི་ཡ་རྩེ་རྒྱལ་པོ་རྣམས་ཀྱིས་རྣམ་ཐོས་ཀྱི་བུ་ལ་འགྲན་པར་ནུས་པའི་མཁོ་དགུའི་ཡོ་བྱད་བསམ་གྱིས་མི་ཁྱབ་པ་ཕུལ་ཞིང་། ཁྱད་པར་སོག་པོ་རྦད་འགྱེལ་དུ་གྲགས་པའི་ནོར་བུ་སོགས་ནོར་སྣའི་རིགས་ཀྱི་མཆོད་རྫས་བོད་ཡུལ་དུ་གདན་ས་ཐེལ་བཟང་བར་གྲགས་པ་ཡང་འདིའི་དུས་བྱུང་། སྤྱན་སྔ་རིན་པོ་ཆེ་ཡན་ཆད་དུ་གོང་མའི་འཇའ་ས་སོགས་མེད་འདུག་ནའང་། འདི་ཉིད་ཀྱི་དུས་ཧུ་ལ་ཧུར་གཏོགས་པ་རྣམས་གོང་མའི་ལུང་གི་འཇའ་ས་དང་བཅས་ལྡན་མ་སྒོམ་བརྩོན་གྱིས་སྤྱི་དཔོན་བྱས་ནའང་ལུགས་དང་འབྲེལ་བར་མ་བྱུང་བས། དཔོན་རྡོ་རྗེ་དཔལ་རྐང་བཞིའི་དཔོན་བྱེད་ཀྱིན་ཡོད་པ་རྒྱལ་བ་རིན་པོ་ཆེས་ཚུར་བཀུག་སྟེ་ཁྲི་དཔོན་དུ་བསྐོས། གོང་སར་ལན་གསུམ་བྱོན། ཕོ་བྲང་སྒང་། ཚོང་འདུས་བྲག་ཁ། སྣེའུ་གདོང་། སྣ་མོ། ཧ་ལ་སྒང་། ཐང་པོ་ཆེ་གླིང་སྨད། འཕྱོས་གཞིས་ཀ། མོན་མཁར་བཀྲ་ཤིས་གདོང་། རྒྱལ་ཐང་། ལྕགས་རྩེ་གྲི་ཁུ། མཆོད་རྟེན་གླིང་། ཆད་དཀར་ཏེ་གཞིས་ཀ་བཅུ་གཉིས་བརྩིགས། མངའ་ཐང་ཤིན་ཏུ་མཐོ་ཞིང་། དཔོན་རང་ཡང་མགོ་ལ་སྒོམ་ཞྭ་དང་། ལུས་ལ་ཆོས་གོས་རྣམ་གསུམ་གྱོན། བཙུན་ཚུགས་མ་དོར་བས་ལུགས་གཉིས་ཐད་ནས་ཀུན་གྱིས་མཐོ་བཟོས་ཆེ། འཁོར་རྣམས་ཀྱང་འཆུན་ཆེ་བའི་སྟབས་ཀྱིས་དྲག་ཞན་མཐའ་དག་གིས་དཔོན་གྱིས་གཟིགས་སར་བག་ཡངས་ཀྱི་སྤྱོད་པ་བྱེད་མི་ནུས་སྐད། ཆོས་རྗེ་བསོད་གྲགས་པས། བཅུ་གཉིས་རིན་པོ་ཆེའི་དུས་གོང་མའི་འཇའ་ས་བྱུང་བ་དང་། ཚེས་བཞི་པའི་དུས་དཔོན་རྡོ་རྗེ་རིན་ཅེན་གྱིས་ཁྲི་དཔོན་བྱས་