[A:127]bzhugs thog ti shri grags 'od dang / rgyal po the mur bog gnyis kyi 'ja' sa stag mgo phul/ khri dpon zur du ma bskos par bla dpon sbrags nas mdzad/ do sngon/ rgyal thang / smon mkhar/ sa 'thon/ byi chung / za ra tho thang / lding gsum/ g.yu sring / mon mkhar sogs gzhon rgyal 'od du dben sha/ dpon chen legs pa dpal/ slob dpon a tsa ra/ dpon chen a blon/ sa skya pa sogs la shor ba rnams phyag rdzas kyis bslu bar mdzad pas/ phag gru khri bskor la bka' drin shin tu che zhing / de'i don gyi si tu rin po che'i bka' chems su/ sne'u gdong gi thab mgo 'dzin pa'i gzhis ka ming can 'di rnams zhi bar gshegs pas/ phyag rdzas kyis bslus pa'i gzhis kyang yin cing / sku drin che ba'i don gyis da lta nyi shu gnyis mchod 'di rang re nang so dang bza' pa mi sde dang bcas pas bdag rkyen byed pa'i don de yin zhes gsung /
dpon rin cen skyabs la jo mo zhang lcam ma dang khra smon 'bum skyid gnyis las/ dang po'i sras rgyal mtshan dpal bzang / grags pa rgyal mtshan/ grags pa bzang po dang gsum/ 'bum skyid kyi sras gong ma ta'i si tu byang chub rgyal mtshan/ grags pa shes rab/ bsod nams bzang po ste yum mi gcig pa'i sku mched drug las/ grags pa rgyal mtshan thos bsam sgom pa mang du mdzad cing / khyad par mgon po'i bka' babs byung zhing gdan sa yun ring du mdzad/ 'di'i dus slob dpon rgyal mtshan bzang pos gong ma'i drung du phyin te lung dang lag rtags sbrel nas khri dpon byas na'ang / bag yangs kyi dbang du song nas lugs gnyis kyi 'dzin bkod cher ma byung zhing / de'i rjes su rgyal mtshan skyabs kyis khri dpon gyi go sar bsdad kyang 'khos ka chung bas kun gyis brnyas pa byas te/ phag mo gru'i sde srid kyi 'dzin tshugs nyag phra ba byung /