[A:128]
de rjes ta'i si tu khri dpon gyi go sar phebs pa yin la/ 'di nyid ni/ thang yig las/ yar klungs mthil nas rnam smin bskyed rgyal 'byung / / phag gis sa rlog dbus khams sa hor za/ / btsan rdzong brgya dang rtsa brgyad phyogs su 'byung / / zhes pa'i lung bstan thog tu babs pa ste/ 'jig rten thams cad kyi byed po gser mngal can gyis gnam ka ba med pa'i sgo phye nas/ rin po che sna bdun sngon du 'gro ba can gyi gdong lnga'i dbang po'i gad rgyangs zad mi shes par sgrogs pa'i khri chen por snying stobs dpa' rtags kyi lus stobs yongs su rdzogs pa'i sa srung dbang po'i snar rigs pa dang mi rigs pa'i sde bzhi'i spyod tshul la rmongs pa'i dra ba mtha' dag gcod pa'i shes rab kyi spu gri rnon po rang byan du 'khor yang ngo tsha dang khrel gzhung sogs ya rabs dam pa'i spyod tshul gyi 'dzam bu chu bo'i gser gyi rgyan bzang pos mdzes par spud pas skye rgu mtha' dag gi ral pa'i cod pan gyi rtse mor 'gying pa la skye bas thob pa'i skal ba mchog gi legs byas kyi zhags pa ring po stong spyi phud kyi rgyal khams su khrims kyi thig drang por 'debs pa'i sa la spyod pa'i mtho ris kyi rgyal po ta'i si tu byang chub rgyal mtshan dge byed ces pa chu pho stag gi lo la sku bltams/ dgung lo gsum la 'bri klog mkhyen pa dang / drug la chos skyong bya rog gdong can gyi rjes gnang gsan pas shin tu 'go ba byung / dgung lo bdun pa la spyan snga chos bzhi pa'i drung du dge bsnyen gyi sdom pa mnos/ mtshan byang chub rgyal mtshan du btags/ dgu pa la mkhan chen tshul dar ba dang / slob dpon pu rangs pa la rab tu byung / bde mgon gyi bsnyen pa mdzad pas dngos grub kyi mtshan ma khyad par can brnyes/ dgung lo bcu bzhi lon pa'i nag pa zla ba'i tshes bcu bdun la sa skyar 'byon pa'i grabs mdzad/ zla ba bzhi pa'i zla stod la sne'u gdong nas thon te glur bzhugs pa'i dgongs 'khor rnams kyis chang