[A:༡༢༧]བཞུགས་ཐོག་ཏི་ཤྲི་གྲགས་འོད་དང་། རྒྱལ་པོ་ཐེ་མུར་བོག་གཉིས་ཀྱི་འཇའ་ས་སྟག་མགོ་ཕུལ། ཁྲི་དཔོན་ཟུར་དུ་མ་བསྐོས་པར་བླ་དཔོན་སྦྲགས་ནས་མཛད། དོ་སྔོན། རྒྱལ་ཐང་། སྨོན་མཁར། ས་འཐོན། བྱི་ཆུང་། ཟ་ར་ཐོ་ཐང་། ལྡིང་གསུམ། གཡུ་སྲིང་། མོན་མཁར་སོགས་གཞོན་རྒྱལ་འོད་དུ་དབེན་ཤ། དཔོན་ཆེན་ལེགས་པ་དཔལ། སློབ་དཔོན་ཨ་ཙ་ར། དཔོན་ཆེན་ཨ་བློན། ས་སྐྱ་པ་སོགས་ལ་ཤོར་བ་རྣམས་ཕྱག་རྫས་ཀྱིས་བསླུ་བར་མཛད་པས། ཕག་གྲུ་ཁྲི་བསྐོར་ལ་བཀའ་དྲིན་ཤིན་ཏུ་ཆེ་ཞིང་། དེའི་དོན་གྱི་སི་ཏུ་རིན་པོ་ཆེའི་བཀའ་ཆེམས་སུ། སྣེའུ་གདོང་གི་ཐབ་མགོ་འཛིན་པའི་གཞིས་ཀ་མིང་ཅན་འདི་རྣམས་ཞི་བར་གཤེགས་པས། ཕྱག་རྫས་ཀྱིས་བསླུས་པའི་གཞིས་ཀྱང་ཡིན་ཅིང་། སྐུ་དྲིན་ཆེ་བའི་དོན་གྱིས་ད་ལྟ་ཉི་ཤུ་གཉིས་མཆོད་འདི་རང་རེ་ནང་སོ་དང་བཟའ་པ་མི་སྡེ་དང་བཅས་པས་བདག་རྐྱེན་བྱེད་པའི་དོན་དེ་ཡིན་ཞེས་གསུང་།
དཔོན་རིན་ཅེན་སྐྱབས་ལ་ཇོ་མོ་ཞང་ལྕམ་མ་དང་ཁྲ་སྨོན་འབུམ་སྐྱིད་གཉིས་ལས། དང་པོའི་སྲས་རྒྱལ་མཚན་དཔལ་བཟང་། གྲགས་པ་རྒྱལ་མཚན། གྲགས་པ་བཟང་པོ་དང་གསུམ། འབུམ་སྐྱིད་ཀྱི་སྲས་གོང་མ་ཏའི་སི་ཏུ་བྱང་ཆུབ་རྒྱལ་མཚན། གྲགས་པ་ཤེས་རབ། བསོད་ནམས་བཟང་པོ་སྟེ་ཡུམ་མི་གཅིག་པའི་སྐུ་མཆེད་དྲུག་ལས། གྲགས་པ་རྒྱལ་མཚན་ཐོས་བསམ་སྒོམ་པ་མང་དུ་མཛད་ཅིང་། ཁྱད་པར་མགོན་པོའི་བཀའ་བབས་བྱུང་ཞིང་གདན་ས་ཡུན་རིང་དུ་མཛད། འདིའི་དུས་སློབ་དཔོན་རྒྱལ་མཚན་བཟང་པོས་གོང་མའི་དྲུང་དུ་ཕྱིན་ཏེ་ལུང་དང་ལག་རྟགས་སྦྲེལ་ནས་ཁྲི་དཔོན་བྱས་ནའང་། བག་ཡངས་ཀྱི་དབང་དུ་སོང་ནས་ལུགས་གཉིས་ཀྱི་འཛིན་བཀོད་ཆེར་མ་བྱུང་ཞིང་། དེའི་རྗེས་སུ་རྒྱལ་མཚན་སྐྱབས་ཀྱིས་ཁྲི་དཔོན་གྱི་གོ་སར་བསྡད་ཀྱང་འཁོས་ཀ་ཆུང་བས་ཀུན་གྱིས་བརྙས་པ་བྱས་ཏེ། ཕག་མོ་གྲུའི་སྡེ་སྲིད་ཀྱི་འཛིན་ཚུགས་ཉག་ཕྲ་བ་བྱུང་།