[A:15]blun rmongs tshang tshing khrod na mang mchis kyang //
phra ldem gnyen lcug dri bzang phon po can//
shes ldan ma la ya dbus g.yur za ldem//
myang na mngar ba'i dpal ster zhim pa'i ro//
yig tshang sbrang rtsi'i bcud kyi nying khu can//
'chal gtam myos byed rdzas kyis ma bslad par//
rkang drug mdzod kyi glegs bu rmad du byung //
zhes bya ba ni bar skabs kyi tshigs su bcad pa'o// //
! de yan chad du don gyi thugs rje chen po'i byin rlabs kyi mthu phul du byung ba las bskrun pa'i rgyal rigs sha stag kyang gnas skabs su chos ldan rgyal po ma byung zhing / 'di nas dam pa chos kyi dbu brnyes pa yin pas/ khri rje thog btsan dang / ru yong bza' stong rgyal na mo tsho'i sras su dpal dge legs kun tu 'bar ba'i bzang po'i snang ba can kyi rnam 'phrul/ lha tho tho ri gnyan btsan 'khrungs te/ rgyal po 'di'i ring la pho brang yum bu gla sgang gi yang thog gi steng du dpang bkong phyag brgya pa/ gser gyi mchod rten/ mdo sde za ma tog gi snying po yi ge drug pa/ tsindha ma Ni'i skor phor rnams mkha' las babs te/ gdung rabs lnga nas 'di'i don shes pa 'byung ba'i lung bstan gyi sgra nam mkha' las bsgrags pas/ ngo mi shes pa ltar bcos kyang / ngo mtshar du bzung nas/ pho brang gi dkor khang du ming gnyan po gsang bar btags nas mchod pa dang bcas te bzhugs su gsol ba'i mthus rgyal po dgung lo brgyad cu pa slar na tshod dar la babs pa'i lang tsho ltar ya mtshan du gyur cing /