[A:182]shis dar rgyas/ padma rta mchog rgyal po/ bya tshe dbang rgyal po/ skal bzang chos kyi rgya mtsho/ bya nor bu rgya mtsho rnams 'khrungs/ gcung shAkya dpal mgon mkhan chen yon tan dbang phyug la rab tu byung ste thos bsam sgom pa lhur blangs nas/ zangs mo cher mkhan thog tu bzhugs/
skal bzang chos kyi rgya mtsho ni mdzad pa 'khrul med sogs bstan bcos mang du mdzad cing / gsung rab la mkhas par grags/ bya bkra shis dar rgyas rtses thang nas dpon sa rdo rje rin cen dbang gi rgyal pos lho rgyud lung gi khri dpon du bskos/ slar yang sne'u gdong rtse nas gong ma ngag gi dbang phyug gis bsko ja bzang po gya nom pa gnang / bya pa khri dpon gyi zhal ngo gcig la 'di nyid grags che zhing / chos rje karma pa rje drung chos grags rgya mtsho la mchog tu gus/ gser gyi bka' 'gyur gyis thog drangs sku gsung thugs kyi rten bzheng ba sogs rnam dkar gyi dge las mang du mdzad/ 'di nyid kyis rdo rje gos dkar mo jo mor blangs pa'i sras/ bya nor bu bkra shis dang / grags pa rgyal mtshan mched gnyis 'khrungs shing / de yang rdo rje gling pa'i lung bstan du/ gnyal lung pa rgyal po gcig gis 'bangs su sdud/ spyan ras gzigs kyi sprul pa'i sku zhig rgyal por 'byon zhes pa'i lung bstan du 'ga' zhig gleng bar mched gnyis kyi nang nas 'brug pa sprul pa'i sku 'jam dbyangs chos grags pas sku tshe'i stod la yab yum gyi bka' nan bzhin rgyal srid bskyangs pa'i sras bstan 'dzin nor bu dang / mtsho skyes rdo rje/ de'i sras gong ma chen po mi pham tshe'i dbang po dang / dmag dpon stag rdo rje/ de gnyis kyi sras karma tshe dbang grags pa dang / gangs dkar rnam rgyal byung ngo // //
! dga' ldan pa dmag dpon bsod nams rgyal po ni/ skyid shod yar phyogs gling zhes par/ mi chung don rgyal du grags pa des chos rgyal srong btsan sgam po