[A:༡༨༢]ཤིས་དར་རྒྱས། པདྨ་རྟ་མཆོག་རྒྱལ་པོ། བྱ་ཚེ་དབང་རྒྱལ་པོ། སྐལ་བཟང་ཆོས་ཀྱི་རྒྱ་མཚོ། བྱ་ནོར་བུ་རྒྱ་མཚོ་རྣམས་འཁྲུངས། གཅུང་ཤཱཀྱ་དཔལ་མགོན་མཁན་ཆེན་ཡོན་ཏན་དབང་ཕྱུག་ལ་རབ་ཏུ་བྱུང་སྟེ་ཐོས་བསམ་སྒོམ་པ་ལྷུར་བླངས་ནས། ཟངས་མོ་ཆེར་མཁན་ཐོག་ཏུ་བཞུགས།
སྐལ་བཟང་ཆོས་ཀྱི་རྒྱ་མཚོ་ནི་མཛད་པ་འཁྲུལ་མེད་སོགས་བསྟན་བཅོས་མང་དུ་མཛད་ཅིང་། གསུང་རབ་ལ་མཁས་པར་གྲགས། བྱ་བཀྲ་ཤིས་དར་རྒྱས་རྩེས་ཐང་ནས་དཔོན་ས་རྡོ་རྗེ་རིན་ཅེན་དབང་གི་རྒྱལ་པོས་ལྷོ་རྒྱུད་ལུང་གི་ཁྲི་དཔོན་དུ་བསྐོས། སླར་ཡང་སྣེའུ་གདོང་རྩེ་ནས་གོང་མ་ངག་གི་དབང་ཕྱུག་གིས་བསྐོ་ཇ་བཟང་པོ་གྱ་ནོམ་པ་གནང་། བྱ་པ་ཁྲི་དཔོན་གྱི་ཞལ་ངོ་གཅིག་ལ་འདི་ཉིད་གྲགས་ཆེ་ཞིང་། ཆོས་རྗེ་ཀརྨ་པ་རྗེ་དྲུང་ཆོས་གྲགས་རྒྱ་མཚོ་ལ་མཆོག་ཏུ་གུས། གསེར་གྱི་བཀའ་འགྱུར་གྱིས་ཐོག་དྲངས་སྐུ་གསུང་ཐུགས་ཀྱི་རྟེན་བཞེང་བ་སོགས་རྣམ་དཀར་གྱི་དགེ་ལས་མང་དུ་མཛད། འདི་ཉིད་ཀྱིས་རྡོ་རྗེ་གོས་དཀར་མོ་ཇོ་མོར་བླངས་པའི་སྲས། བྱ་ནོར་བུ་བཀྲ་ཤིས་དང་། གྲགས་པ་རྒྱལ་མཚན་མཆེད་གཉིས་འཁྲུངས་ཤིང་། དེ་ཡང་རྡོ་རྗེ་གླིང་པའི་ལུང་བསྟན་དུ། གཉལ་ལུང་པ་རྒྱལ་པོ་གཅིག་གིས་འབངས་སུ་སྡུད། སྤྱན་རས་གཟིགས་ཀྱི་སྤྲུལ་པའི་སྐུ་ཞིག་རྒྱལ་པོར་འབྱོན་ཞེས་པའི་ལུང་བསྟན་དུ་འགའ་ཞིག་གླེང་བར་མཆེད་གཉིས་ཀྱི་ནང་ནས་འབྲུག་པ་སྤྲུལ་པའི་སྐུ་འཇམ་དབྱངས་ཆོས་གྲགས་པས་སྐུ་ཚེའི་སྟོད་ལ་ཡབ་ཡུམ་གྱི་བཀའ་ནན་བཞིན་རྒྱལ་སྲིད་བསྐྱངས་པའི་སྲས་བསྟན་འཛིན་ནོར་བུ་དང་། མཚོ་སྐྱེས་རྡོ་རྗེ། དེའི་སྲས་གོང་མ་ཆེན་པོ་མི་ཕམ་ཚེའི་དབང་པོ་དང་། དམག་དཔོན་སྟག་རྡོ་རྗེ། དེ་གཉིས་ཀྱི་སྲས་ཀརྨ་ཚེ་དབང་གྲགས་པ་དང་། གངས་དཀར་རྣམ་རྒྱལ་བྱུང་ངོ་༎ ༎
༈ དགའ་ལྡན་པ་དམག་དཔོན་བསོད་ནམས་རྒྱལ་པོ་ནི། སྐྱིད་ཤོད་ཡར་ཕྱོགས་གླིང་ཞེས་པར། མི་ཆུང་དོན་རྒྱལ་དུ་གྲགས་པ་དེས་ཆོས་རྒྱལ་སྲོང་བཙན་སྒམ་པོ་