[A:༡༨༦]སྟོབས་འབྱོར་གསེར་གྱི་འཛིན་མས་བསྐོར༎
ཡ་རབས་རྣམ་ཐར་ལྷུན་པོའི་རྩེར༎
རྒྱལ་ཕྲན་ཉེ་དབང་ཚོགས་ཀྱི་འདུས༎
ཆོས་སྲིད་བླང་དོར་གནས་ཀུན་ལ༎
མ་འདྲེས་གཟིགས་པའི་སྤྱན་སྟོང་ལྡན༎
སྡེ་སྲིད་མཆོད་སྦྱིན་བརྒྱ་པ་གང་༎
སྲིད་འདིར་མཐོ་བའི་ཁྲི་ལ་འགྱིང་༎
དེ་ལྟར་གོང་མ་ཏའི་སི་ཏུ་ནས་བཟུང་སྟེ། བོད་གཉན་ཞན་གྱི་གོ་རིམ་སིལ་བུར་མ་གྱུར་གྱི་བར། སྲིད་ཀྱིས་མངོན་པར་མཐོ་བ་ཕལ་ཆེར་ནི་སྡེ་སྲིད་གོང་མའི་ཐུགས་ལ་བཏགས་ཤིང་། ལུང་དང་ལས་ཀ་གནང་བ་ཤས་ཆེ་ནའང་། ས་སྐྱོང་ལྷ་རྒྱ་རི་བ་ནི། གོང་ས་ནས་ལུང་དང་འཇའ་ས་ཆེད་དུ་མ་བླངས་པར། ཉི་འོག་གི་རྒྱལ་པོར་གྱུར་པ་ཞིག་སྟེ། དེ་ཡང་བོད་ཆོས་རྒྱལ་གྱི་གདུང་བརྒྱུད་དྲི་མ་མེད་པ་གནམ་ལྡེ་འོད་སྲུངས་ཀྱི་སྲས་མངའ་བདག་དཔལ་འཁོར་བཙན་གྱི་བརྒྱུད་ཚ་བ་ཁྲི་བཀྲ་ཤིས་བརྩེགས་པའི་སྲས་གསུམ་གྱི་འོད་ལྡེ་ལས་རིམ་པར་བྱུང་བ། འོད་སྐྱིད་འབར་གྱི་སྲས་གཙང་ཚ་སྤུན་དྲུག་ལས་བརྒྱུད་དེ། གདན་ས་ཐེལ་གྱི་མདར་བཅད་པོ་ཚ་བ་རོང་པ་ཞེས་མི་དཔོན་ཞིག་དཔལ་ཕག་མོ་གྲུ་པ་རྡོ་རྗེ་རྒྱལ་པོའི་དུས་བྱུང་ཞིང་། དེ་ནས་རིམ་པར་བརྒྱུད་ནང་སོ་མདའ་སྨད་པས། ཨེ་སྟོད་ཆུ་ཚན་ཁ་ཞབས་སུ་རི་ལ་རྩྭ་རྒྱ་བོ་སྐྱེས་པ་ཞིག་ན་གཞིས་ཀ་བརྩིགས་པས་རྒྱ་རི་ཞེས་མིང་དུ་ཆགས།
དེ་ནས་ལྷ་ཆོས་ཀྱི་བཤེས་གཉེན་སོགས་ཞལ་ངོ་རིམ་པར་བྱུང་བ་ལས། ལྷ་དགྲ་ལས་རྣམ་རྒྱལ་གྱིས་རི་རྫོང་དུ་བཞུགས། ཐམས་ཅན་མཁྱེན་པ་དགེ་