[A:189]phrag bdun gyi phyogs su nye ba na/ gang gis kyang gzhom gzhig nus pa'i go skabs phra mo tsam yang ring du spangs pa'i bsod nams kyi dpung pa can/ sa'i tshangs pa ta'i si tu byang chub rgyal mtshan gyis gzhan dring mi 'jog pa'i dpa' mdzangs rtul phod pa'i rnam dpyod kyi bod yangs pa'i sa kun la dbang sgyur ba nas bzung / dus yun ring po'i bar du dpal phag mo gru pa'i sde srid kyi bka' khrims gdugs dkar po gcig gis 'og tu khyab tshul sngon du brjod ma thag pa de lta na'ang / zhabs drung gong ma chen po zhing khams gzhan du 'pho ba'i tshul bstan pa'i mjug tu/ phag gru'i mtshan don mi rgyug pa dang / glo bur gyi rgyal po zhig 'byung ba sogs dus 'grig pas/ 'phreng mgo gter ston shes rab 'od zer gyi thugs rje chen po padma'i dbang phyug gi lung bstan du/ sgra snyan 'dra ba'i gnas sgo ru: 'jig rten dbang phyug sprul pa nyid: ar tha'i ming mdzin byung gyur na: lho byang glo bur rgyal po byed: sgrub pa snying po'i bstan pa 'dzugs: mi lo lnga bcur bde la 'god: skye ba'i rten 'brel ma 'grig na: yul de rang 'pho gud pa dang : mtha' ma rlung gis 'khyer du nye: zhes sde pa 'phreng mgo ba'i mi ngo zhig gis glo bur gyi rgyal po byed pa'i lung bstan dang / gnang rtse nas kyi gsang ba'i lung bstan du/ gtsang phyogs rgyal po padma'i ming can 'byung : sku tshe mthar phyin bdud dbang ma gyur na: zhes pa lhad bcug pa min na rin spungs pa'i sras padma dkar pos bod spyi'i rgyal po byed par bshad pa sogs ni rten 'brel 'phyugs pas thog tu ma phebs la/ padma'i rgyal tshab mnga' ris paN chen dang rigs 'dzin legs ldan pa'i bla ma bka' brgyud yongs 'dus kyi lung bstan du/
'dzam gling shar lho'i phyogs mtshams su:
bdud mo rno myur nag mo la:
bu dgu skyes nas 'dzam gling 'joms:
khyad par bod yul gangs can 'dir:
ma 'ongs bzhi bcur