[A:༡༨༩]ཕྲག་བདུན་གྱི་ཕྱོགས་སུ་ཉེ་བ་ན། གང་གིས་ཀྱང་གཞོམ་གཞིག་ནུས་པའི་གོ་སྐབས་ཕྲ་མོ་ཙམ་ཡང་རིང་དུ་སྤངས་པའི་བསོད་ནམས་ཀྱི་དཔུང་པ་ཅན། སའི་ཚངས་པ་ཏའི་སི་ཏུ་བྱང་ཆུབ་རྒྱལ་མཚན་གྱིས་གཞན་དྲིང་མི་འཇོག་པའི་དཔའ་མཛངས་རྟུལ་ཕོད་པའི་རྣམ་དཔྱོད་ཀྱི་བོད་ཡངས་པའི་ས་ཀུན་ལ་དབང་སྒྱུར་བ་ནས་བཟུང་། དུས་ཡུན་རིང་པོའི་བར་དུ་དཔལ་ཕག་མོ་གྲུ་པའི་སྡེ་སྲིད་ཀྱི་བཀའ་ཁྲིམས་གདུགས་དཀར་པོ་གཅིག་གིས་འོག་ཏུ་ཁྱབ་ཚུལ་སྔོན་དུ་བརྗོད་མ་ཐག་པ་དེ་ལྟ་ནའང་། ཞབས་དྲུང་གོང་མ་ཆེན་པོ་ཞིང་ཁམས་གཞན་དུ་འཕོ་བའི་ཚུལ་བསྟན་པའི་མཇུག་ཏུ། ཕག་གྲུའི་མཚན་དོན་མི་རྒྱུག་པ་དང་། གློ་བུར་གྱི་རྒྱལ་པོ་ཞིག་འབྱུང་བ་སོགས་དུས་འགྲིག་པས། འཕྲེང་མགོ་གཏེར་སྟོན་ཤེས་རབ་འོད་ཟེར་གྱི་ཐུགས་རྗེ་ཆེན་པོ་པདྨའི་དབང་ཕྱུག་གི་ལུང་བསྟན་དུ། སྒྲ་སྙན་འདྲ་བའི་གནས་སྒོ་རུ༔ འཇིག་རྟེན་དབང་ཕྱུག་སྤྲུལ་པ་ཉིད༔ ཨར་ཐའི་མིང་མཛིན་བྱུང་གྱུར་ན༔ ལྷོ་བྱང་གློ་བུར་རྒྱལ་པོ་བྱེད༔ སྒྲུབ་པ་སྙིང་པོའི་བསྟན་པ་འཛུགས༔ མི་ལོ་ལྔ་བཅུར་བདེ་ལ་འགོད༔ སྐྱེ་བའི་རྟེན་འབྲེལ་མ་འགྲིག་ན༔ ཡུལ་དེ་རང་འཕོ་གུད་པ་དང་༔་མཐའ་མ་རླུང་གིས་འཁྱེར་དུ་ཉེ༔་ཞེས་སྡེ་པ་འཕྲེང་མགོ་བའི་མི་ངོ་ཞིག་གིས་གློ་བུར་གྱི་རྒྱལ་པོ་བྱེད་པའི་ལུང་བསྟན་དང་། གནང་རྩེ་ནས་ཀྱི་གསང་བའི་ལུང་བསྟན་དུ། གཙང་ཕྱོགས་རྒྱལ་པོ་པདྨའི་མིང་ཅན་འབྱུང་༔ སྐུ་ཚེ་མཐར་ཕྱིན་བདུད་དབང་མ་གྱུར་ན༔་ཞེས་པ་ལྷད་བཅུག་པ་མིན་ན་རིན་སྤུངས་པའི་སྲས་པདྨ་དཀར་པོས་བོད་སྤྱིའི་རྒྱལ་པོ་བྱེད་པར་བཤད་པ་སོགས་ནི་རྟེན་འབྲེལ་འཕྱུགས་པས་ཐོག་ཏུ་མ་ཕེབས་ལ། པདྨའི་རྒྱལ་ཚབ་མངའ་རིས་པཎ་ཆེན་དང་རིགས་འཛིན་ལེགས་ལྡན་པའི་བླ་མ་བཀའ་བརྒྱུད་ཡོངས་འདུས་ཀྱི་ལུང་བསྟན་དུ།
འཛམ་གླིང་ཤར་ལྷོའི་ཕྱོགས་མཚམས་སུ༔
བདུད་མོ་རྣོ་མྱུར་ནག་མོ་ལ༔
བུ་དགུ་སྐྱེས་ནས་འཛམ་གླིང་འཇོམས༔
ཁྱད་པར་བོད་ཡུལ་གངས་ཅན་འདིར༔
མ་འོངས་བཞི་བཅུར་