[A:19]de las dbang po'i gzhu ltar bkra ba'i kha dog sna lnga 'phros pa pha ri brag la spyan ras gzigs/ sgrol ma/ rta mgrin gyi sku'i snang brnyan rang byon du shar ba la phog de las kyang yi ge drug pa la tshur phog pa'i 'od zer gyi 'phreng ba 'dren byed kyi yul du ngo mtshar ba'i gzigs mor gyur pa la 'ja' mdangs zhes skye bo rnams gleng ngo/ / de nas bal po'i lha bzo dag gi sor mo'i sgyu rtsal gyis sku dang gsung gi rten rnams ji ltar byon pa bzhin du gsal bar brkos/ rim bzhin rgyal po 'khor bcas po ta lar phebs nas 'chi ba med pa'i pho brang sa la 'phos pa ltar yid du 'ong zhing kun gsal bu mo'i 'gram stegs ltar mtho btsan gyi pho brang bzhengs nas sprul pa'i dmag dpung dang lhan cig tu bzhugs pas/ mtha'i rgyal po thams can kyi rna bar da lta bod kyi yul na rgyal po mgo gnyis pa thogs pa med par sprul pa'i dmag 'gyed thub pa'i rdzu 'phrul yod pa thos pas 'jigs rngam gyi dbang gis dus gcig tu yong ba'i ched so yod pa ltar pho brang gsar du brtsigs pa la legs rdar bsnyad pa'i don zhu gsol gus 'dud lhur len gyi skyes bzang po'i yi ge dang bcas blon po mngags pa rnams la lan gyi chab shog so so'i yi ger btab cing / bzang po'i gsung dang gya nom pa'i dngos pos tshim par byas te brdzangs pas/ rgyal po kun yid rang dbang med par dga' bar mdzad do/ /
rje btsun 'jig rten dbang phyug mi rje'i tshul gyis 'gro ba skyong bar shes bya thams cad la lkog tu gyur pa'i mun pa mkhyen pa'i 'od stong gis cha tsam yang med par bsal na'ang / blo dman gyi 'gro ba'i snang ngo dang 'tsham pa'i phyir du/ rgyal srid lugs zung gi khrims rnam par dag pas 'dzin pa la yi ge 'di yon tan thams cad kyi rtsa ba lta bur dgongs nas/ mgon po zur phud lnga pa'i byin rlabs kyi ga bur gsar pa'i thigs pa snying la 'phog pas/ rmongs rtul gyi