[A:༡༩]དེ་ལས་དབང་པོའི་གཞུ་ལྟར་བཀྲ་བའི་ཁ་དོག་སྣ་ལྔ་འཕྲོས་པ་ཕ་རི་བྲག་ལ་སྤྱན་རས་གཟིགས། སྒྲོལ་མ། རྟ་མགྲིན་གྱི་སྐུའི་སྣང་བརྙན་རང་བྱོན་དུ་ཤར་བ་ལ་ཕོག་དེ་ལས་ཀྱང་ཡི་གེ་དྲུག་པ་ལ་ཚུར་ཕོག་པའི་འོད་ཟེར་གྱི་འཕྲེང་བ་འདྲེན་བྱེད་ཀྱི་ཡུལ་དུ་ངོ་མཚར་བའི་གཟིགས་མོར་གྱུར་པ་ལ་འཇའ་མདངས་ཞེས་སྐྱེ་བོ་རྣམས་གླེང་ངོ། ། དེ་ནས་བལ་པོའི་ལྷ་བཟོ་དག་གི་སོར་མོའི་སྒྱུ་རྩལ་གྱིས་སྐུ་དང་གསུང་གི་རྟེན་རྣམས་ཇི་ལྟར་བྱོན་པ་བཞིན་དུ་གསལ་བར་བརྐོས། རིམ་བཞིན་རྒྱལ་པོ་འཁོར་བཅས་པོ་ཏ་ལར་ཕེབས་ནས་འཆི་བ་མེད་པའི་ཕོ་བྲང་ས་ལ་འཕོས་པ་ལྟར་ཡིད་དུ་འོང་ཞིང་ཀུན་གསལ་བུ་མོའི་འགྲམ་སྟེགས་ལྟར་མཐོ་བཙན་གྱི་ཕོ་བྲང་བཞེངས་ནས་སྤྲུལ་པའི་དམག་དཔུང་དང་ལྷན་ཅིག་ཏུ་བཞུགས་པས། མཐའི་རྒྱལ་པོ་ཐམས་ཅན་ཀྱི་རྣ་བར་ད་ལྟ་བོད་ཀྱི་ཡུལ་ན་རྒྱལ་པོ་མགོ་གཉིས་པ་ཐོགས་པ་མེད་པར་སྤྲུལ་པའི་དམག་འགྱེད་ཐུབ་པའི་རྫུ་འཕྲུལ་ཡོད་པ་ཐོས་པས་འཇིགས་རྔམ་གྱི་དབང་གིས་དུས་གཅིག་ཏུ་ཡོང་བའི་ཆེད་སོ་ཡོད་པ་ལྟར་ཕོ་བྲང་གསར་དུ་བརྩིགས་པ་ལ་ལེགས་རྡར་བསྙད་པའི་དོན་ཞུ་གསོལ་གུས་འདུད་ལྷུར་ལེན་གྱི་སྐྱེས་བཟང་པོའི་ཡི་གེ་དང་བཅས་བློན་པོ་མངགས་པ་རྣམས་ལ་ལན་གྱི་ཆབ་ཤོག་སོ་སོའི་ཡི་གེར་བཏབ་ཅིང་། བཟང་པོའི་གསུང་དང་གྱ་ནོམ་པའི་དངོས་པོས་ཚིམ་པར་བྱས་ཏེ་བརྫངས་པས། རྒྱལ་པོ་ཀུན་ཡིད་རང་དབང་མེད་པར་དགའ་བར་མཛད་དོ། །
རྗེ་བཙུན་འཇིག་རྟེན་དབང་ཕྱུག་མི་རྗེའི་ཚུལ་གྱིས་འགྲོ་བ་སྐྱོང་བར་ཤེས་བྱ་ཐམས་ཅད་ལ་ལྐོག་ཏུ་གྱུར་པའི་མུན་པ་མཁྱེན་པའི་འོད་སྟོང་གིས་ཆ་ཙམ་ཡང་མེད་པར་བསལ་ནའང་། བློ་དམན་གྱི་འགྲོ་བའི་སྣང་ངོ་དང་འཚམ་པའི་ཕྱིར་དུ། རྒྱལ་སྲིད་ལུགས་ཟུང་གི་ཁྲིམས་རྣམ་པར་དག་པས་འཛིན་པ་ལ་ཡི་གེ་འདི་ཡོན་ཏན་ཐམས་ཅད་ཀྱི་རྩ་བ་ལྟ་བུར་དགོངས་ནས། མགོན་པོ་ཟུར་ཕུད་ལྔ་པའི་བྱིན་རླབས་ཀྱི་ག་བུར་གསར་པའི་ཐིགས་པ་སྙིང་ལ་འཕོག་པས། རྨོངས་རྟུལ་གྱི་