[A:21]chos/ 'jig rten/ gzhon nu/ gzi brjid/ 'o ma sogs kyis mtshon par rgya skad la/ e ka/ dharma/ lo ka ku mA ra/ te dzasra/ pa yasra brjod pas/ ca cha ja zha za 'a rnams mi dgos pa 'dir bsnan te/ dbyangs bzhi gsal byed sum cur gtan la phab nas/ lanydza la dpe byas nas dbu chen/ wurtu la dpe byas nas shar ma sogs yi ge'i gzugs dang brda gsal bar byed pa'i sum rtags sogs bod la nyer mkho'i bstan bcos brgyad mdzad nas rgyal po la phul/ spyan ras gzigs kyi mdo rgyud nyi shu rtsa gcig sogs chos du ma bsgyur ba ni ljongs 'dir dam pa'i chos bsgyur ba'i thog ma yin no/ / rgyal pos bstan pa rin po che'i btsas su dgongs nas blon po la bkur sti rgya cher mdzad pas/ blon po gzhan phrag dog par/
thon mis/
yul mtha' 'khob bod kyi rgyal khams 'dir//
mi mkhas pas sleb pa'i sngon ma yin//
nga mun pa sel ba'i sgron me yin//
rje rgyal po nyi zla'i tshul du bzhugs//
grogs blon po'i khrod na nga tsam med//
bod kha ba can pa'i mi rnams la//
nga thon mi bka' drin mi che 'am//
zhes gzhan gyi 'gran sems kyi brag ri dri ma med pa'i dpyod ldan gyi mdzad pa dang gsung gi gnam lcags kyi thog mdas sil bur btang ngo / / gsung 'di dag la dpags na dus skabs bzang po de dag tu yang blun pos shes ldan la gshe ba 'di yod tshod du 'dug go/ /