[A:22]
de ltar yi ge 'dri klog gi srol legs par btod nas/ dge ba bcu'i khrims kyi steng du dkon cog la gus pa/ dam chos bsgrub pa/ pha ma la bkur ba/ yod tan can gong du bkur ba/ rigs mtho dang rgan la phu dud/ mdza' bshes la gzhung / yul mi la phan 'dogs pa/ yid drang ba/ mig ya rabs la lta ba/ zas nor la spyod shes pa/ drin can la phan lan/ bre srang la g.yo sgyu med pa/ spyi snyoms shing phrag dog med pa/ bud med kyi kha la mi nyan pa/ ngag 'jam zhing smra mkhas pa/ theg pa che zhing blo khog yangs pa ste/ mi chos gtsang ma bcu drug gi khrims/ btsan pos phyag rgyas btab ste 'bras ldan dus kyi mkha' la rta ljang gi dbang po shar ba ltar gsal zhing / gser gyi gnya' shing 'dzin ri ltar lci bar mdzad pas/ bod chen po'i rgyal khams kyi khyon kun la gnas pa'i skye rgu mtha' dag mngon par mtho ba dang nges par legs pa'i dga' ston lan cig min par myong bar mdzad do/ / smras pa/
'gro ba'i bsod nams dpyid kyi mngal khur las//
dpag bsam yongs 'du'i rgyal sras mtshar sdug can//
'thon pa'i phyag na padma mi yi srid//
bzung 'dis rdzogs ldan dri de ring nas 'gugs//
mkha' me'i srad bur brgyus pa'i ka 'phreng la//
rgya mtsho dbyangs kyis brgyan pa'i yi ge'i brda'i//
rin cen phyang 'phrul rin du gser ldan lto//
nor bu'i zong gis bkang yang khugs sam ci//