[A:༢༡]ཆོས། འཇིག་རྟེན། གཞོན་ནུ། གཟི་བརྗིད། འོ་མ་སོགས་ཀྱིས་མཚོན་པར་རྒྱ་སྐད་ལ། ཨེ་ཀ། དྷརྨ། ལོ་ཀ་ཀུ་མཱ་ར། ཏེ་ཛསྲ། པ་ཡསྲ་བརྗོད་པས། ཅ་ཆ་ཇ་ཞ་ཟ་འ་རྣམས་མི་དགོས་པ་འདིར་བསྣན་ཏེ། དབྱངས་བཞི་གསལ་བྱེད་སུམ་ཅུར་གཏན་ལ་ཕབ་ནས། ལཉྫ་ལ་དཔེ་བྱས་ནས་དབུ་ཆེན། ཝུརྟུ་ལ་དཔེ་བྱས་ནས་ཤར་མ་སོགས་ཡི་གེའི་གཟུགས་དང་བརྡ་གསལ་བར་བྱེད་པའི་སུམ་རྟགས་སོགས་བོད་ལ་ཉེར་མཁོའི་བསྟན་བཅོས་བརྒྱད་མཛད་ནས་རྒྱལ་པོ་ལ་ཕུལ། སྤྱན་རས་གཟིགས་ཀྱི་མདོ་རྒྱུད་ཉི་ཤུ་རྩ་གཅིག་སོགས་ཆོས་དུ་མ་བསྒྱུར་བ་ནི་ལྗོངས་འདིར་དམ་པའི་ཆོས་བསྒྱུར་བའི་ཐོག་མ་ཡིན་ནོ། ། རྒྱལ་པོས་བསྟན་པ་རིན་པོ་ཆེའི་བཙས་སུ་དགོངས་ནས་བློན་པོ་ལ་བཀུར་སྟི་རྒྱ་ཆེར་མཛད་པས། བློན་པོ་གཞན་ཕྲག་དོག་པར།
ཐོན་མིས།
ཡུལ་མཐའ་འཁོབ་བོད་ཀྱི་རྒྱལ་ཁམས་འདིར༎
མི་མཁས་པས་སླེབ་པའི་སྔོན་མ་ཡིན༎
ང་མུན་པ་སེལ་བའི་སྒྲོན་མེ་ཡིན༎
རྗེ་རྒྱལ་པོ་ཉི་ཟླའི་ཚུལ་དུ་བཞུགས༎
གྲོགས་བློན་པོའི་ཁྲོད་ན་ང་ཙམ་མེད༎
བོད་ཁ་བ་ཅན་པའི་མི་རྣམས་ལ༎
ང་ཐོན་མི་བཀའ་དྲིན་མི་ཆེ་འམ༎
ཞེས་གཞན་གྱི་འགྲན་སེམས་ཀྱི་བྲག་རི་དྲི་མ་མེད་པའི་དཔྱོད་ལྡན་གྱི་མཛད་པ་དང་གསུང་གི་གནམ་ལྕགས་ཀྱི་ཐོག་མདས་སིལ་བུར་བཏང་ངོ་། ། གསུང་འདི་དག་ལ་དཔགས་ན་དུས་སྐབས་བཟང་པོ་དེ་དག་ཏུ་ཡང་བླུན་པོས་ཤེས་ལྡན་ལ་གཤེ་བ་འདི་ཡོད་ཚོད་དུ་འདུག་གོ། །