[A:25]la rang dbang du spyod pa'i mi rje la sras mo mi las 'das pa'i lha gcig mig skya'i longs spyod la rnam par 'khu ba'i 'byor pa'i bang mdzod/ rgyal ba bu ram shing pa dgung lo bcu gnyis pa'i sku brnyan sogs tshad ma'i yul du gyur pa las/ lha gcig gnyis khab tu bzhes na/ rgya bal gyi phun sum tshogs pa'i yon tan gyi dngos po thams cad khab len gyi rdo dang lcags kyi snang tshul ltar 'byung bar dgongs nas 'jig rten mi'i chos lugs dang sgo bstun te/ gnas skabs su bod mtha' 'khob kyi rgyal por gyur pas/ pho nya ba tsam mngags pa la mi ster bar dgongs nas/ rgyal po nyid kyi spyan g.yas pa'i 'od zer las/ 'khor los sgyur ba'i rgyal po mtshan dpe dang ldan zhing / rta/ glang po/ blon po/ dmag dpon/ btsun mo/ 'khor lo/ nor bu ste/ sngon du 'gro ba'i dpung tshogs yan lag rnam bzhi dang bcas pa'i sprul pa bal po'i rgyal po'i sgo drung du phyin te/ blon po rin po ches brda sbyar nas/ nged kha ba can gyi yul 'phags pa phyag na padmas byin gyis brlabs shing / 'phags pa nyid rgyal po'i tshul bzung ba yin pas/ rgyal po khyed kyi bu mo khro gnyer can ma'i sprul par 'dug pa nged kyi jo mor bsu bas/ rten skal shAkya mu ni/ byams pa chos 'khor/ tsan dan gyi sgrol ma rnams rdzongs su skur zhig de ltar mi byed na yul 'dir kha ba can gyi rgyal po'i pho brang 'debs so zhes bal skad du smras pas/ bal po'i rje 'bangs kun skrag nas rang dbang med par khas blangs te/ yab kyis lha gcig la 'gro bar gsungs pas/ lha gcig gis yab la zhu ba phul ba/
kye ma yab gcig rgyal po lags//
bod ces bya ba dmangs rigs gdol pa'i rigs//
blun zhing mtha' 'khob ston pas zhabs ma bcags//