[A:26]mchod gnas med cing tshogs gsog rten ma mchis//
rgyal ba'i 'khor bzhi grogs bzang dge 'dun med//
chos dang chos min mi shes mun pa'i smag rum 'dra//
zhe sdang gdug sems che ba gnod byed srin po'i rigs//
'char la snyom bag che ba byol song spre'u'i rigs//
de 'dra'i mtha' 'khob gnas su bdag mchis na//
bdag gi bsod nams gsog pa'i rten dang mchod gnas su//
yab kyi mchod gnas shAkya mu ni dang //
byams pa sgrol ma bdag la gnang bar zhu//
bod ces bya ba yi dwags grong khyer te//
mi ltogs rgyal khams yin par rgyal bas lung bstan pas//
rin cen bang mdzod mang po bdag la zhu//
kha ba can gyi rgyal khams bsil zhing grang //
tshe gcig dros pa'i gos shig bdag la zhu//
de ltar ma 'dris mi yi khrod nang du//
bsam rgyud spyod pa bya ba ji ltar bgyi//
yab gcig rgyal po bdag la bka' stsol cig/
ces zhus pas/ rgyal pos/
kye ma mig 'bras 'dra ba'i bu mo tshur gson cig/
bod ces bya ba khyad par 'phags pa'i yul//
ri mtho sa gtsang gangs ri gnyan gyi mgul//
bsil la dro ba lha gnas gzhal yas khang //