[A:27]chu bo bzhi 'bab rgya mtsho bzhi yis mdzes//
'bru sna sna tshogs rin cen sna tshogs 'byung //
rkang 'gros sgur spyod rtsi thog mar la spyod//
rje ni lha yin 'bangs ni mi yis byas//
'khor bzhi med kyang byang chub sems dpa'i brgyud//
dam chos med kyang rgyal po'i dka' khrims gnas//
dge 'dun med kyang rgyal po sprul pa yin//
zhes bod kyi rje 'bangs yul gru la bsngags pa mdzad nas/ lha gcig gi spro ba bsrings te/ bod kyi sprul pa'i blon po rin po che dang / lha gcig rgyu mtshan mthun pa'i mchod gnas dam pa 'chi ba med pa'i bdag po mchod sbyin brgya pas sbyin bdag byas te/ sprul pa'i bzo bo las sna tshogs pa'i sor mo'i 'du byed las bskrun pa'i shAkya mu ni dgung lo brgyad pa'i sku tshad can rgyal ba nyid kyis rab gnas mdzad pa/ sangs rgyas 'od srungs kyis rab gnas mdzad pa'i byams pa chos 'khor/ tsan dan gyi sgrol ma rang byung / nor bu ratna de wa/ stag sha de wa/ bai DUraya'i lhung bzed sogs/ rin po che'i bang mdzod bdun gyis thog drangs mkho dgu'i yo byad rnams skal rdzongs su mdzad de/ khri btsun la bslab bya 'di ltar/
sngon tshe bu mos pha yul bzung ba med//
de phyir bu mo khyod kyang bod yul song //
bka' btags chos lugs bzang po dar bar gyis//
rje yi sku mkhar pho brang btsan po 'chos//
chos bzhengs dkon cog gsum gyi rten yang tshugs//
khyad par 'phags pa'i rten yang bzhengs su gsol//
gtsug lag rgyal ba'i sku gzugs dam pa bzhengs//
sangs rgyas bstan pa rgyas par mdzad pa yi//
dge 'dun ston pa'i bstan pa dar bar mdzod//
ces sogs 'phral yun du dgos pa'i bslab bya dang bcas te bod du brdzangs/ de'i tshe skyes bu mchog dman bar pa gsum la snang ba mi 'dra ba gsum byung ste/ sangs rgyas dang byang chub sems dpa' rnams kyis gzigs ngor/ 'phags pa spyan ras gzigs dang jo mo khro gnyer can mjal nas mkha' la 'od zer dang bcas te bod du byon nas bzhugs par gzigs/ bal po'i rje 'bangs rnams kyis/ khri btsun btsun mo rin po che'i chas su zhugs nas bod du bzhud par mthong / bod 'bangs rnams kyis bai DUraya'i khrab kyi rten dang bcas te bod blon rta pa lnga brgya bal yul du brdzangs pa rnams kyis khri btsun rgyal po'i btsun mor spyan drangs pa mthong / de nas rgyal pos bkod pas khyad par 'phags pa'i bsu ba dang / dga' ston rgya chen po mdzad de lha gcig btsun mo rin po che'i khri la dbang bskur ro/ / shAkya mu ni sogs skal rdzongs kyi rten khyad par can rnams dang / sngar sprul pa'i dge slong gis spyan drangs pa'i rten rnams lhan cig tu mchod pa'i khang bzang yid du 'ong bar bzhugs su gsol nas/ kun tu bzang po'i mchod pa'i sprin gyis mchod cing / btsan po yang sku rnams kyi thad ka nas 'ben tshad gang las ring du mi bzhud par bzhugs pas/ khri btsun gyi thugs la/ rgyal po 'di lha dang mi las khyad par du 'phags pa'i yon tan mnga' ba zhig 'dug na'ang / pho brang gi phyi rol tu mi 'byon pa ni mtha'i dmag la 'jigs par gda' bas/ pho brang btsan po zhig rgyag par