[A:47]thugs rje chen po rang byon lnga ldan gyi thugs ka las 'od zer ston ka'i zla ltar dkar ba shar nas/ gtsug lag khang gi phyi nang thams cad gsal bar byas pas bskul te rta mgrin/ sgrol ma/ sman bla/ byams pa chos 'khor/ jo bo mi bskyod pa/ rme ba brtsegs pa/ 'od dpag med/ mar me mdzad rnams kyi thugs ka las 'od zer sna tshogs pa 'phros te/ 'phrul snang gi bar mtshams med par khyab pas 'od zer 'phros pa'i lha brgyad du grags so/ / dus der blon po sna chen po dang khri lcam gnyis ma gtogs med pas/ slar gzhan rnams 'phrul snang du 'tshogs te the tshom du gyur pa na/ sngar gyi byung tshul rnams bshad pa dang / thon mis li yul gyi dge tshul dang / khra 'brug gi sprang ban la rgyal pos sprul pa bstan pa'i lo rgyus bshad pas nges shes su gyur/ 'on kyang bod 'bangs byings kyi snang ngor bran mo zhig rims nad kyis btab pa bal mo bza' la dgos/ de las chos rgyal dang kong jo gnyis la yang mched de/ yab yum gsum ka 'phan yul zal mo'i sgang du gshegs pa'i pur yar klung 'phyong rgyas su spyan drangs te bang so brtsigs so//
chos kyi rgyal po 'di nyid kyi ring la rgyal ba'i sku gsung thugs kyi rten dang brten pa'i gtsug lag khang bzheng ba/ dam pa'i chos bsgyur ba dang / thos bsam sgom gsum sogs kyi srol legs par btod pas/ rang cag gangs can pa rnams kyis ni 'di nyid kyi bka' drin 'dzin ma'i khyon mtha' dag yid bzhin gyi nor bu rin po ches bkang yang 'khor ba'i thabs rnyed pa ma yin no/ / chos rjes bsod nams grags pas/ rgyal po 'di nyid kyi ring la bstan pa'i dbu brnyes par 'chad pa ni deb ther yig tshang sogs la zhib cha dman zhing / rtog dge'i rig pa tsam gyis rang bzo la thal ba'i skyon yin no/ / de yang rgyal po bka' chems dang lung bstan mdzad pa'i nang du/ bstan pa rin po che