[A:48]'dzin pa dang / khyad par 'phrul snang gi gtsug lag khang 'di la phud dud mdzad pa'i dam pa rnams kyi lung bstan mtha' yas pa yod pa'i khrod nas/ dge slong byang sems shar phyogs sku 'khrungs pa'i// gsang sngags 'chang zhing rnal 'byor chen po ni// snying po'i mtha' can skyes chen dam pas ni// zhal yang bsgyur zhing rnyed bkur dam pa mdzad// ces pa'i don shar phyogs btsong kha'i yul du sku 'khrungs shing 'jam dpal snying po'i mtshan can gyis shAkya mu ni sprul sku longs skur zhal bsgyur zhing / cho 'phrul gyi mchod pa rgya chen po mdzad tshul gyi rgyal ba btsong kha pa chen po'i lung bstan mngon sum gyi tshad mas grub pa la/ dpa' bo gtsug lag 'phreng bas/ byang chub sems dpa' shar lhor sku bltams pa// zhes bcos byas nas/ dwags po sgam tshul gyi lung bstan du smra ba ni/ rang nyid chos brgyad kyi chang gis bag med du myos shing / blang dor la blta ba'i mig phyogs lhung drag po'i rab rib kyis ldongs pas/ rang dang rjes su zhugs pa mtha' dag gtam ya mtshan can du 'dod kyang / don du mkhas pa'i dbang po 'jam mgon sa skya paNDi ta'i gsung las/ blo ngan las la spyod pa la/ / rang gi 'bad pas thob par sems/ / khyi rgan ya rkan phug pa'i khrag / rus pa'i bcud du bsgoms nas 'cha'/ / zhes pa ltar shes ldan rnams kyi brtags tshe bzhad gad kyi gnas te/ sgam po tshul khrims snying po gnyal bod snyir 'khrungs pas/ lho rgyud gnyal zhes kun la grags shing / mkhas pa kun gyis gleng ba'i lung bstan la bzo bcos byed pa ni byed pa po rang nyid blun por dngos su bstan pa'i phyir na tshig gzhan rnams la legs nyes kyi rtog dpyod bya ma dgos so/ / gzhan yang chos kyi rgyal po thugs rje chen po'i thugs kar thim pa'i skor der gtam rgyud sngon ma 'ga' zhig gi lugs bskyar ba las/ rang lugs dang gzhan lugs kyi dbye ba phyed pa'i chos rab tu rnam 'byed kyi shes