[A:༤༧]ཐུགས་རྗེ་ཆེན་པོ་རང་བྱོན་ལྔ་ལྡན་གྱི་ཐུགས་ཀ་ལས་འོད་ཟེར་སྟོན་ཀའི་ཟླ་ལྟར་དཀར་བ་ཤར་ནས། གཙུག་ལག་ཁང་གི་ཕྱི་ནང་ཐམས་ཅད་གསལ་བར་བྱས་པས་བསྐུལ་ཏེ་རྟ་མགྲིན། སྒྲོལ་མ། སྨན་བླ། བྱམས་པ་ཆོས་འཁོར། ཇོ་བོ་མི་བསྐྱོད་པ། རྨེ་བ་བརྩེགས་པ། འོད་དཔག་མེད། མར་མེ་མཛད་རྣམས་ཀྱི་ཐུགས་ཀ་ལས་འོད་ཟེར་སྣ་ཚོགས་པ་འཕྲོས་ཏེ། འཕྲུལ་སྣང་གི་བར་མཚམས་མེད་པར་ཁྱབ་པས་འོད་ཟེར་འཕྲོས་པའི་ལྷ་བརྒྱད་དུ་གྲགས་སོ། ། དུས་དེར་བློན་པོ་སྣ་ཆེན་པོ་དང་ཁྲི་ལྕམ་གཉིས་མ་གཏོགས་མེད་པས། སླར་གཞན་རྣམས་འཕྲུལ་སྣང་དུ་འཚོགས་ཏེ་ཐེ་ཚོམ་དུ་གྱུར་པ་ན། སྔར་གྱི་བྱུང་ཚུལ་རྣམས་བཤད་པ་དང་། ཐོན་མིས་ལི་ཡུལ་གྱི་དགེ་ཚུལ་དང་། ཁྲ་འབྲུག་གི་སྤྲང་བན་ལ་རྒྱལ་པོས་སྤྲུལ་པ་བསྟན་པའི་ལོ་རྒྱུས་བཤད་པས་ངེས་ཤེས་སུ་གྱུར། འོན་ཀྱང་བོད་འབངས་བྱིངས་ཀྱི་སྣང་ངོར་བྲན་མོ་ཞིག་རིམས་ནད་ཀྱིས་བཏབ་པ་བལ་མོ་བཟའ་ལ་དགོས། དེ་ལས་ཆོས་རྒྱལ་དང་ཀོང་ཇོ་གཉིས་ལ་ཡང་མཆེད་དེ། ཡབ་ཡུམ་གསུམ་ཀ་འཕན་ཡུལ་ཟལ་མོའི་སྒང་དུ་གཤེགས་པའི་པུར་ཡར་ཀླུང་འཕྱོང་རྒྱས་སུ་སྤྱན་དྲངས་ཏེ་བང་སོ་བརྩིགས་སོ༎
ཆོས་ཀྱི་རྒྱལ་པོ་འདི་ཉིད་ཀྱི་རིང་ལ་རྒྱལ་བའི་སྐུ་གསུང་ཐུགས་ཀྱི་རྟེན་དང་བརྟེན་པའི་གཙུག་ལག་ཁང་བཞེང་བ། དམ་པའི་ཆོས་བསྒྱུར་བ་དང་། ཐོས་བསམ་སྒོམ་གསུམ་སོགས་ཀྱི་སྲོལ་ལེགས་པར་བཏོད་པས། རང་ཅག་གངས་ཅན་པ་རྣམས་ཀྱིས་ནི་འདི་ཉིད་ཀྱི་བཀའ་དྲིན་འཛིན་མའི་ཁྱོན་མཐའ་དག་ཡིད་བཞིན་གྱི་ནོར་བུ་རིན་པོ་ཆེས་བཀང་ཡང་འཁོར་བའི་ཐབས་རྙེད་པ་མ་ཡིན་ནོ། ། ཆོས་རྗེས་བསོད་ནམས་གྲགས་པས། རྒྱལ་པོ་འདི་ཉིད་ཀྱི་རིང་ལ་བསྟན་པའི་དབུ་བརྙེས་པར་འཆད་པ་ནི་དེབ་ཐེར་ཡིག་ཚང་སོགས་ལ་ཞིབ་ཆ་དམན་ཞིང་། རྟོག་དགེའི་རིག་པ་ཙམ་གྱིས་རང་བཟོ་ལ་ཐལ་བའི་སྐྱོན་ཡིན་ནོ། ། དེ་ཡང་རྒྱལ་པོ་བཀའ་ཆེམས་དང་ལུང་བསྟན་མཛད་པའི་ནང་དུ། བསྟན་པ་རིན་པོ་ཆེ་