[A:49]rab kyi dpyad pa med pa'i dgos med kyi tshig tshogs sogs kyis mtshon pa la rmongs pa rnams yang dag par 'dod srid na'ang / blo ldan dag ci'i phyir rjes su 'jug ste/ mi gtsang ba'i ngan skyugs kyi phung po la khyi phag sogs kyis longs spyod na'ang / mi'i 'gro ba su zhig gis za bar mi byed pa bzhin no//
de nas dbon sras/ mang srong man btsan gyis rgyal srid bzung / dus der rgya rnams kyis sprul pa'i rgyal po ma bzhugs par shes nas dmag 'ongs pa 'phrul snang du sleb pa dang / rme brtsegs kyi sku las sprul pa'i dmag byung bas phyir bros/ de'i lan du mgar gyis bod dmag 'bum tsho khrid nas rgya rnams bcom/ mgar yang dmag thog tu grongs/ de nas slar rgya dmag gi skad chen po byung bas jo bo lho sgo med long can du bcug sgo la zhal ba byas nas 'jam dbyangs kyi sku bris/ mi ring bar rgya dmag rnams lhags te po ta la'i pho brang me la bsregs/ jo bo shAkya mu ni 'khyer ma thub kyang mi bskyod rdo rje snga dro gcig gi sar gdan drangs so/ / mang srong dgung lo nyi shu rtsa bdun la gtsang gi bar snang sgang du gshegs/ bang so gung srong gi g.yon du brtsigs/ rje de la 'bro bza' khra bo khri ma lod khab tu bzhes pa'i sras 'dus srong mang po rje rlung nam 'phrul gyi rgyal po yab 'das nas zhag 'ga' zhig song ba dang 'khrungs/ 'di'i ring la rngog ring la nag pos glang po che'i phru gu theg pa/ rngog gling gam gyis g.yag grus po che theg gnon rgyal mtshan gyis mda' ste'u kha mas bya khra'i sked pa bcad/ dbas rgod ldongs btsan gyis mig rgyang gsum la mda' rgyang gis sleb/ 'gos g.yag chung gis sha ba'i rlid bu bye mas bkang ba klad la bskor/ cog ro 'brong shor gyis 'brong 'thur du brgyugs pa gyen la 'then/ gnon khri bdun g.yu sbyin gyis rta g.yang la mchongs pa gyen la 'then nus pa ste/ rtsal po che bdun byung / bang so mang srong g.yon du brtsigs/