[A:58]bod du yun ring bzhugs ma bzhugs kyi lo rgyus du ma snang ba/ mchog dman gyi blo ngor shar tshul yin yang / rgyu mtshan ma go bar so so'i lugs la zhen te gtam sna tshogs smra ba ni/ rje sa paN gyis/ mkhas pa rang gis dpyod shes kyi/ / blun po grags pa'i rjes su 'brang // khyi rgan ku co 'don pa na/ / rgyu mtshan med par gzhan dag rgyug / ces gsung ba'i rnam thar 'dzin pa yin zhing / bya ba sprul pa'i sku padma dkar por grags pa'i snyigs dus kyi mkhas pa chen po de'i gsung las/ de ni dus gcig la sku'i bkod pa sna tshogs ston pa'i rdzu 'phrul can yin pas/ de dag la go rim mi dgos kyi gtan tshigs su bsgrub dka' 'o/ / zhes pa ni rnam dpyod kyi rtsal dang ldan pa'i legs bshad kyis gsung yin no//
de nas slob dpon gyis sde brgyad thams cad dam la btags te lha 'dre rnams dga' ba'i mthun rdzas dang bcas/ dregs pa zil gnon gyi mgur gsungs nas nam mkha' la rdo rje'i gar mdzad cing sa gzhi byin gyis brlabs/ rgyal pos dar dkar gyi na bza' gsol/ gser gyi sta re thogs nas rmang brkos pas khru gang tsam gyis 'og nas sa zhag dkar ser dmar gsum ro phun sum tshogs pa bro ba byung bas btsan po thugs dgyes so/ / de nas mkhan pos gtsug lag khang gi bzo dbyibs kyi bkod pa mdzad par bzhed de/ sngon mu stegs kyi rigs 'dzin zhig gis ro bsgrubs pas dngos grub len par nye ba na/ grogs rtags mtshan dang ldan pa zhig dgos pas/ dbus 'gyur 'chang gi dge slong sgrub pa po'i dge tshul la ldan par shes nas/ gser gyi maNDal dge slong la rin du phul nas/ dge tshul dang lhan du sgrub khang du phyin te/ dge tshul la ro'i lce gcod tshul bslabs te/ lce gser gyi ral grir 'gro ba bzung nas yid la gang yod sar 'gro nus pas nged la thod/ ro gser du 'gro ba