[A:61]gshegs pa dang byang chub sems dpa' mi'i srid pa bzung ba'i sprul pa'i zlos gar mu mtha' med par ston pa la/ skye bo tha mal pa'i snang tshul dper bzung mi dgos so/ /
de ltar dpal bsam yas mi 'gyur lhun gyis grub pa'i gtsug lag khang zil gnon zhes pa me pho rta'i lo la rdzogs par grub ste/ mkhan slob gnyis kyis rab tu gnas par mdzad pas/ dbu rtse'i lha rnams phyi rol tu byon pa/ rta mgrin gyis rta skad theng gsum bton pa/ padma'i sdong po skyes pa sogs ngo mtshar ba'i ltas khyad par du 'phags pa byung ba'i grags snyan dbyangs bdun brgyud du 'khrugs pa'i rnga bo che srid rtse'i bar du bsgrags so/ /
de ltar rab gnas dga' ston gyi tshe/ rje 'bangs thams cad kyis phun sum tshogs pa'i rgyan gos bzang po spras te lha dang mi'i 'dod yon longs spyod thams cad byed pos gcig tu bsdus pa lta bu'i phyi nang gsang ba'i mchod pa dang / mkho rgu'i yo byad kyi dpal 'byor rmugs 'dzin gyi bang mdzod la dga' bder spyod pa lta bu dang bcas te/ tam bu ra'i rgyud las nye bar drangs pa'i snyan pa'i dbyangs dang dga' ba'i gar gyis 'dzin ma'i khyon mtha' dag rnam par gang bas skabs gsum pa thams cad me tog gi char sogs mchod sprin mngon par spro ba'i zol gyis lta bar lhags so/ / smras pa/
zhi ba mchog gi mkha' dbyings lus phra'i mig/
sdom gsum dbang gzhu'i ri mo rnam bkra'i 'od//
thun mtshams dar bab gzhon nu dgugs byed pa'i//
nges legs sa bon srog 'tsho'i sman gyi bcud//