[A:76]rgyal ba'i ku co drag po 'don bzhin du/ glang dar ma 'u dum btsan rgyal srid du dbang bskur/ sbas stag snas nang blon byas te/ chos bsnub par bsams kyang bsnyad ma rnyed pa'i skabs su/ sad ser mu ge nad yams 'ga' zhig byung ba la bsnyad gdags par 'dod de 'bangs rnams la rgyu mtshan dris pas ma shes zer bar/ btsan pos rgya mo kong jo zhes bya ba'i gnod sbyin mo zhig gis gnod sbyin gyi lha shAkya mu ni bya ba bod du khyer 'ongs pas lan te/ de yang dang por lha 'di ri rab kyi rtser 'ongs pas lha rnams kyi g.yul pham zhing 'ongs/ de nas o rgyan ma ga dha rgya nag sogs su rim gyis 'ongs pas mi shis pa byung ba sogs yid nag po'i gdon gyis bskyongs ba'i gtam du ma smras/ lo paN phal cher yul gzhan du bros shing / ma byon pa 'ga' zhig bkum/ rab byung phal cher 'dul ba'i sde snod las gsungs pa'i rtags dang bral zhing / mi nyan pa rnams rngon pa byed du bcug gsung rab phal cher lha sa'i brag la sbas shing / 'ga' zhig me dang chur sbyangs/ gtsug lag khang rnams 'jig pa'i thog ma 'phrul snang nas bya bar brtsams te/ jo bo rnam gnyis chu la bskyur ba'i gtam smras pa dang / blon po chos la dga' ba rnams kyis/ sku gzugs ha cang lci bas sgul ma nus par bsnyad btags te bye ltongs su sbas/ byams pa chos 'khor yin pa ltar byas nas rdo mtsho la bskyur te ku sgra chen po bton/ ra sa/ bsam yas/ ra mo che rnams kyi gtsug lag khang gi sgo la zhal ba byas/ rgyal po dgyes su re nas btsun pa chang 'thung ba sogs kyi gzugs brnyan bris/ 'on kyang khyim pa gos dkar gyi rten la gsang sngags sgrub pa dag ni nang gi de nyid rgyal blon gyis ma rtogs shing / rab byung gi rtags med pas gnod pa ma byung ba dpag med yod pas/ kun mkhyen ye bzang rtse ba'i zhal nas/ de ltar 'dul ba'i bstan pa la 'phel 'grib byung mod kyi/ theg pa chen po gsang