[A:༧༦]རྒྱལ་བའི་ཀུ་ཅོ་དྲག་པོ་འདོན་བཞིན་དུ། གླང་དར་མ་འུ་དུམ་བཙན་རྒྱལ་སྲིད་དུ་དབང་བསྐུར། སྦས་སྟག་སྣས་ནང་བློན་བྱས་ཏེ། ཆོས་བསྣུབ་པར་བསམས་ཀྱང་བསྙད་མ་རྙེད་པའི་སྐབས་སུ། སད་སེར་མུ་གེ་ནད་ཡམས་འགའ་ཞིག་བྱུང་བ་ལ་བསྙད་གདགས་པར་འདོད་དེ་འབངས་རྣམས་ལ་རྒྱུ་མཚན་དྲིས་པས་མ་ཤེས་ཟེར་བར། བཙན་པོས་རྒྱ་མོ་ཀོང་ཇོ་ཞེས་བྱ་བའི་གནོད་སྦྱིན་མོ་ཞིག་གིས་གནོད་སྦྱིན་གྱི་ལྷ་ཤཱཀྱ་མུ་ནི་བྱ་བ་བོད་དུ་ཁྱེར་འོངས་པས་ལན་ཏེ། དེ་ཡང་དང་པོར་ལྷ་འདི་རི་རབ་ཀྱི་རྩེར་འོངས་པས་ལྷ་རྣམས་ཀྱི་གཡུལ་ཕམ་ཞིང་འོངས། དེ་ནས་ཨོ་རྒྱན་མ་ག་དྷ་རྒྱ་ནག་སོགས་སུ་རིམ་གྱིས་འོངས་པས་མི་ཤིས་པ་བྱུང་བ་སོགས་ཡིད་ནག་པོའི་གདོན་གྱིས་བསྐྱོངས་བའི་གཏམ་དུ་མ་སྨྲས། ལོ་པཎ་ཕལ་ཆེར་ཡུལ་གཞན་དུ་བྲོས་ཤིང་། མ་བྱོན་པ་འགའ་ཞིག་བཀུམ། རབ་བྱུང་ཕལ་ཆེར་འདུལ་བའི་སྡེ་སྣོད་ལས་གསུངས་པའི་རྟགས་དང་བྲལ་ཞིང་། མི་ཉན་པ་རྣམས་རྔོན་པ་བྱེད་དུ་བཅུག་གསུང་རབ་ཕལ་ཆེར་ལྷ་སའི་བྲག་ལ་སྦས་ཤིང་། འགའ་ཞིག་མེ་དང་ཆུར་སྦྱངས། གཙུག་ལག་ཁང་རྣམས་འཇིག་པའི་ཐོག་མ་འཕྲུལ་སྣང་ནས་བྱ་བར་བརྩམས་ཏེ། ཇོ་བོ་རྣམ་གཉིས་ཆུ་ལ་བསྐྱུར་བའི་གཏམ་སྨྲས་པ་དང་། བློན་པོ་ཆོས་ལ་དགའ་བ་རྣམས་ཀྱིས། སྐུ་གཟུགས་ཧ་ཅང་ལྕི་བས་སྒུལ་མ་ནུས་པར་བསྙད་བཏགས་ཏེ་བྱེ་ལྟོངས་སུ་སྦས། བྱམས་པ་ཆོས་འཁོར་ཡིན་པ་ལྟར་བྱས་ནས་རྡོ་མཚོ་ལ་བསྐྱུར་ཏེ་ཀུ་སྒྲ་ཆེན་པོ་བཏོན། ར་ས། བསམ་ཡས། ར་མོ་ཆེ་རྣམས་ཀྱི་གཙུག་ལག་ཁང་གི་སྒོ་ལ་ཞལ་བ་བྱས། རྒྱལ་པོ་དགྱེས་སུ་རེ་ནས་བཙུན་པ་ཆང་འཐུང་བ་སོགས་ཀྱི་གཟུགས་བརྙན་བྲིས། འོན་ཀྱང་ཁྱིམ་པ་གོས་དཀར་གྱི་རྟེན་ལ་གསང་སྔགས་སྒྲུབ་པ་དག་ནི་ནང་གི་དེ་ཉིད་རྒྱལ་བློན་གྱིས་མ་རྟོགས་ཤིང་། རབ་བྱུང་གི་རྟགས་མེད་པས་གནོད་པ་མ་བྱུང་བ་དཔག་མེད་ཡོད་པས། ཀུན་མཁྱེན་ཡེ་བཟང་རྩེ་བའི་ཞལ་ནས། དེ་ལྟར་འདུལ་བའི་བསྟན་པ་ལ་འཕེལ་འགྲིབ་བྱུང་མོད་ཀྱི། ཐེག་པ་ཆེན་པོ་གསང་