[A:75]! de ltar tshul bzhin rnam par sbyod pa ma yin pa'i stobs kyi khengs pas dregs pa mtha' dag rang nyams su byed pa'i lugs kun chu shing gi snying po lta bur mdzad de rab tu lci ba'i rin po che'i gdan khri la g.yo ba med pa'i phyogs las rnam par rgyal ba'i gdugs dkar po'i khor yug bde skyid kyi grib bsil la/ skye rgu mtha' dag ngal gso'i bde ba la spyod pa'i skabs/ nag po'i phyogs kyis yid rnam par brlams pa'i sdig blon rnams mi bzod pa'i zug rngu chen pos mnar bar gyur te/ chos khrims 'jig pa'i gros bshams nas/ mo rtsis mkhan po rnams bya dgas tshims par byas nas/ lha sras gtsang ma ma spyugs na/ rgyal srid 'jig par lung bstan pa bzhin du mon la spyugs/ sbas stag snas blon po bran kha dpal yon dang btsun mo gnyis mthun zhes rgyal po la phra ma bcug pas/ btsun mo ngang tshul lcebs/ bran chen pos lcags kyi srog rtsa bsgrubs pas ma 'grub par bkum/ de rjes btsad po blo ngan zhes pa chu mo bya'i lo la sbas stag sna sogs sdig blon rnams kyis zhal ltag pa'i ngos su gcus te bkrongs nas bang so don mkhar mda'i g.yon phyogs su brtsigs so//
de nas ri dwags mtshan ma can gyi kau mu dI rna ba brgyad pa'i byed pos/ sA la'i nags ljongs kyi yul grur khor yug tshar du dngar ba'i sprin gyi so can dag gi long su spyod pa'i shed las skyes pa mtha' dag gi bde legs kyi mthu shin tu phra bar gyur pas/ gya gyu'i bro gar rtse ba'i mdun na 'don bzlog tu med pa'i las kyi mthu mi zad pa'i chu 'dzin gyi 'phreng ba stug po las/ mi dge ba bcu la bag med par spyod pa'i skyin thang drag pos legs byas dpyid kyi ma ma'i mngal khur las 'das pa'i thub bstan myu gu'i khri shing gsar pa ming tsam du gyur pas/ tshangs 'joms sder bcas rnam par dge ba'i g.yul las