[A:6]gsungs pas/ slad nas kyang lo rgyus la 'dris par 'dod pa'i blo ldan dag gis dpyad par bya'o/ /
de yang ston pa 'di nyid kyi gdung la nyi ma'i gnyen dang bu ram shing pa shAkya zhes brjod pa ni/ yul gru 'dzin du rgyal po brgya tham pa byung ba'i mtha' ma rna ba can gyi bu gau ta ma dang bha ra dhwa dza gnyis las/ sngon mas rab tu byung ste lo ma'i spyil po yid du 'ong ba'i bsam gtan gyi khang bur gnas pa'i tshe/ g.yo can padma'i rtsa lag dang bzang mo dga' mgur spyod pa'i dus las yol bas/ bzang mo bsad pa'i ral gri khrag can lo ma'i spyil po'i nye 'dabs su bor ba'i rkyen gyis gau ta ma bsal shing la bskyon pa'i dus/ drang srong mdog nag gi rdzu 'phrul gyis gru char gyi thigs pa dang / dri bzhon lus la reg pa'i rkyen gyis 'dod pa'i gnas rjes su dran pa'i yid kyi shing rtas drangs te/ khams kyi dwangs ma gnyis lhan cig tu lhung ba las sgo nga gnyis su gyur pa nyi 'od kyis bskyangs shing khye'u gnyis bu ram gyi shing gseb tu zhugs pas ming de ltar du grags la/ bu ram shing pa'i brgyud la rgyal po brgya byung ba'i mtha' ma 'phags skyes po/ 'phags skyes po la sras bzhi byung yang btsun mo 'das te slar stobs ldan gyi rgyal po gzhan zhig gi bu mo khab tu blangs par sras byung na rgyal srid du dbang bskur bar khas blangs pas dam bcas/ sras sngon ma rnams spyugs pa rang rang gi sring mo dang bcas te chu bo skal ldan shing rta'i 'gram du ming sring lhan cig tu 'dus pa las shAkya'i brgyud ces grags pa yin no//
de yang kun mkhyen nyi ma'i gnyen 'di nyid 'khrungs lor mkhas grub rnams kyi bzhed tshul mang du mchis kyang don grub ces pa sa lug dbyar zla 'bring po'i chu stod kyi nya ba'i tshes bco lnga'i dus su/ yum gso sbyong la gnas pa'i lhums su glang po che'i phrug gu thal dkar gyi rnam par gyur nas zhugs/