[A:82]pos gsang sngags thig le'i skor bsgyur nas rab byung du ma khyim par phab pas chos log mkhan po yin zhes smra ba ni/ paNDi ta rang gi rtogs pa'i yon tan gyi dod ma mnyam pa'i rab tu byung ba 'ga' zhig sngags kyi de kho na nyid ma rtogs par 'chal ba'i skyon byung ba bden na'ang / paNDi ta gsang ba shes rab lta bu'i grub pa'i dbang phyug chos log mkhan po zhes ngan smras byed pa ni/ rang nyid ngan song mu mtha' med pa bsgrub pa'i rgyu yin pas shes ldan rnams bag yod par byos shig/ smras pa/
yid srubs byed po'i dpung gi sngo bsangs ma'i//
bde srid rnam par bzhad pa'i 'dab stong tshal//
zum tshe slar yang skal bzang rta bdun gyis//
thub bstan nyin byed gsar pa drangs so kye//
nus pa'i stobs ldan dpa' dang rtul phod pa'i//
dpal ldan phyogs las rgyal ba'i rdo rje'i sdes//
rnon po'i nyag phran rgyud las 'phos pa'i tshe//
sdig can btsad po'i snying la zug rngu byin//
e ma mkhas btsun bzang po'i snyan grags kyi//
yon por blta ba'i mig gi lcags kyu yis//
byang chub 'od stong gsal mdzad sgra 'dzin gyi//
zhags pa'i phon po yang yang 'gugs sam snyam//