[A:99]'phags pa mched gsum pa de gdan sa chen por gdan drangs/ gser gling lhun grub sdings kyi dgon pa btab/ slob dpon zangs tsha'i jo mo gung thang lha gcig mdzes ma la slob dpon ma bsod nams 'bum dang nyi ma 'bum gnyis byung / de'i nye gnas ma rje rong ma rdo rje ldan la slob dpon ye shes 'byung gnas 'khrungs/ 'azangs yul gyi rgyal po hUM ka ra rje'i bla ma mdzad/ slob dpon zangs tsha'i jo mo jo lcam hor mo la slob dpon rin cen 'byung gnas 'khrungs pa chung ngu nas gshegs/ 'gro mgon phyag na'i jo mo ma gcig mkha' 'gro 'bum la sras dharma pA la rakShi ta 'khrungs/ slob dpon ye shes 'byung gnas kyi sras su bdag nyid chen po bzang po dpal ba bo dong er 'khrungs/ 'phags pa rin po che gshegs rjes 'gro mgon phyag na sku dbang btsan pas dharma rakShi ta khong rang gi sras su song bas gdan sa'i mthil du bzhag gong ma'i drung du bdag nyid chen po bzang po dpal ba sa skya'i gdung brgyud min tshul sogs kyi snyan phra phul ba la brten/ rgyal po'i lung gis rgya mtsho chen po'i chu 'jam nyi shu bsgral ba'i gling chung zhig tu phebs dgos pa byung / de'i bar du dharma pA la rakShi ta yab sras gshegs pas/ sa skya'i dpon chen sogs bka' gros la dbang ba rnams kyis bla ma bdag nyid chen po gdan drangs chog pa'i gong sar mi sna btang yang don ma mthong bas/ chos rje khu dbon gyi mgon po'i bka' babs kyi slob ma gya a snyan dam pa kun dga' grags kyi byon te/ rgyal po'i pho brang steng du kha'u'i rdo char dang / bya rog re'u chung gi bong tshod tsam lcags kyi mchu sder can zhig skad sgrog cing gshog pa brdeb pa sogs byung bas/ dam pa kun grags pas/ bla ma bdag nyid chen po sa skya pa'i zhal ngo yin pa la brnyas pas lan pa'i rgyu mtshan zhus pas/ bdag nyid chen po pho brang du spyan drangs/ bkur sti phun sum tshogs pa dang bcas gdan sa chen po'i khrir phebs