[A:༩༩]འཕགས་པ་མཆེད་གསུམ་པ་དེ་གདན་ས་ཆེན་པོར་གདན་དྲངས། གསེར་གླིང་ལྷུན་གྲུབ་སྡིངས་ཀྱི་དགོན་པ་བཏབ། སློབ་དཔོན་ཟངས་ཚའི་ཇོ་མོ་གུང་ཐང་ལྷ་གཅིག་མཛེས་མ་ལ་སློབ་དཔོན་མ་བསོད་ནམས་འབུམ་དང་ཉི་མ་འབུམ་གཉིས་བྱུང་། དེའི་ཉེ་གནས་མ་རྗེ་རོང་མ་རྡོ་རྗེ་ལྡན་ལ་སློབ་དཔོན་ཡེ་ཤེས་འབྱུང་གནས་འཁྲུངས། འཟངས་ཡུལ་གྱི་རྒྱལ་པོ་ཧཱུཾ་ཀ་ར་རྗེའི་བླ་མ་མཛད། སློབ་དཔོན་ཟངས་ཚའི་ཇོ་མོ་ཇོ་ལྕམ་ཧོར་མོ་ལ་སློབ་དཔོན་རིན་ཅེན་འབྱུང་གནས་འཁྲུངས་པ་ཆུང་ངུ་ནས་གཤེགས། འགྲོ་མགོན་ཕྱག་ནའི་ཇོ་མོ་མ་གཅིག་མཁའ་འགྲོ་འབུམ་ལ་སྲས་དྷརྨ་པཱ་ལ་རཀྵི་ཏ་འཁྲུངས། སློབ་དཔོན་ཡེ་ཤེས་འབྱུང་གནས་ཀྱི་སྲས་སུ་བདག་ཉིད་ཆེན་པོ་བཟང་པོ་དཔལ་བ་བོ་དོང་ཨེར་འཁྲུངས། འཕགས་པ་རིན་པོ་ཆེ་གཤེགས་རྗེས་འགྲོ་མགོན་ཕྱག་ན་སྐུ་དབང་བཙན་པས་དྷརྨ་རཀྵི་ཏ་ཁོང་རང་གི་སྲས་སུ་སོང་བས་གདན་སའི་མཐིལ་དུ་བཞག་གོང་མའི་དྲུང་དུ་བདག་ཉིད་ཆེན་པོ་བཟང་པོ་དཔལ་བ་ས་སྐྱའི་གདུང་བརྒྱུད་མིན་ཚུལ་སོགས་ཀྱི་སྙན་ཕྲ་ཕུལ་བ་ལ་བརྟེན། རྒྱལ་པོའི་ལུང་གིས་རྒྱ་མཚོ་ཆེན་པོའི་ཆུ་འཇམ་ཉི་ཤུ་བསྒྲལ་བའི་གླིང་ཆུང་ཞིག་ཏུ་ཕེབས་དགོས་པ་བྱུང་། དེའི་བར་དུ་དྷརྨ་པཱ་ལ་རཀྵི་ཏ་ཡབ་སྲས་གཤེགས་པས། ས་སྐྱའི་དཔོན་ཆེན་སོགས་བཀའ་གྲོས་ལ་དབང་བ་རྣམས་ཀྱིས་བླ་མ་བདག་ཉིད་ཆེན་པོ་གདན་དྲངས་ཆོག་པའི་གོང་སར་མི་སྣ་བཏང་ཡང་དོན་མ་མཐོང་བས། ཆོས་རྗེ་ཁུ་དབོན་གྱི་མགོན་པོའི་བཀའ་བབས་ཀྱི་སློབ་མ་གྱ་ཨ་སྙན་དམ་པ་ཀུན་དགའ་གྲགས་ཀྱི་བྱོན་ཏེ། རྒྱལ་པོའི་ཕོ་བྲང་སྟེང་དུ་ཁའུའི་རྡོ་ཆར་དང་། བྱ་རོག་རེའུ་ཆུང་གི་བོང་ཚོད་ཙམ་ལྕགས་ཀྱི་མཆུ་སྡེར་ཅན་ཞིག་སྐད་སྒྲོག་ཅིང་གཤོག་པ་བརྡེབ་པ་སོགས་བྱུང་བས། དམ་པ་ཀུན་གྲགས་པས། བླ་མ་བདག་ཉིད་ཆེན་པོ་ས་སྐྱ་པའི་ཞལ་ངོ་ཡིན་པ་ལ་བརྙས་པས་ལན་པའི་རྒྱུ་མཚན་ཞུས་པས། བདག་ཉིད་ཆེན་པོ་ཕོ་བྲང་དུ་སྤྱན་དྲངས། བཀུར་སྟི་ཕུན་སུམ་ཚོགས་པ་དང་བཅས་གདན་ས་ཆེན་པོའི་ཁྲིར་ཕེབས་