[A:378]gzhi thog tu slob dpon chen po nam mkha' rgyal mtshan gyis tshad ma'i slob dpon gyis slob gnyer mgo thon gsungs pa la/ bdag gis mi 'ong gzhan su la zhal da byon yang chog mi gsung par zhus pas ma gsan/ 'o na bu chung gis bshad gsar nam zin pa'i snga dro bdag dge sbyor zhig la 'gro bas/ de nas de'i gegs su 'gro ba'i zhal da ma gnang bas/ de bar la bzhugs pa'i chad so byas/ der bzhugs kyi bar la yang khengs grags dang rnyed pa/ bkur sti la sogs pa mi chen gyi dpal 'byor phun sum tshogs pa rnams la/ skyug nad can gyi sngas su zas bzhag pa lta bu zhen log gi bsam pas gang la yang chags pa med cing nges 'byung gi bsam pa drag po kho na 'khrungs te nga 'di nas nam thon pa'i dus cig 'ong ngam snyam pas su dang yang blo sna ma bstun cing / dpon chen la sogs pa mi chen nang mi thams cad la yang bstun cha dang sems 'dzin chen po ye ma byas/ 'di tsho dang bstun nas dga' 'brel mang na da gzod bcings nas chos la gtong du mi 'dod/ 'di tsho dang ma bstun yang mi brtsi ba cig byung na rang gi 'dod pa grub snyam pas phyed dkar gyi spyod pa mang po byas gsung / de nas lo gcig lhag song ba dang chos khri thang du bu chung gis bshad gsar legs par tshar ba'i snga dro/ bu chung gis slob dpon byed dgos/ gsungs nas nan cher gsung byung yang / sngar gyi 'jam dbyangs pa dang chad so byas pa bzhin/ brag khar chos rje grags pa seng ge'i drung du byon nas bzhugs pas/ chos rje pa'i gsung nas chos thag chod byed na yul gyi 'khri ba chod la shog /lto gos chos gsum ngas sbyor ba yin gsungs nas/ yul phyogs su byon/ zhing yul yod pa rnams btsongs/ rin la gos phyi nang la sogs pa'i srang bcu bdun byung / se gcig kyang ma bzung bar chos rje'i phyag tu phul/ gzhan zho gang yang bdag bzung ma mdzad de/ spyil po stong pa cig tu bzhugs nas da ni bla ma 'di'i drung du tshe dang sgrub pa mnyam pa cig byas