[A:502] rigs gter la sogs pa du ma gsan no/ /gzhan yang bdag po bla ma chen po kun dga' rgyal mtshan pa'i drung du/ kye rdor DoM bi lugs/ sgrol ma bcu bdun ma'i dbang / chos rje dpal ldan bla ma dam pas mdzad pa'i bka' 'bum dus 'khor 'grel chen gyi 'grel bshad chen mo la sogs pa puu sti sum cu so lhag cig gi lung / sa skya pa'i dge bshes mang po la mdzad pa las phal che bas rdzogs par gsan pa ma byung / chos rje rin po che 'di nyid ni sku na gzhon nu nas/ don gnyer dang thugs rtsol gzhan dang mi 'dra bas yongs su rdzogs par gsan no/ /de nas sku na gzhon nu'i dus su sa skya na bzhugs pa'i dge ba'i bshes gnyen bzang ba phal mo che ba'i sku mdun du byon te/ grub mtha' phyag len la sogs pa'i dri ba dang / phyag dpe'i rigs su la ci 'dug gi rtog dpyod mdzad pa na/ zur khang pa'i dge ba'i bshes gnyen dge slong mgon po dpal zhes bya ba sa dkar logs na bzhugs pa cig yod pa na re/ sa skya pa'i chos legs po cig shes par 'dod na/ bla ma gong ma'i gsung rab blta rtog legs po byed dgos pa yin gsungs pas/ de la thugs nges shes gting nas 'drongs te/ de shin tu bden/ ci nas kyang de lta bu cig bya dgos snyam du dgongs te/ chos rje ye shes rgyal mtshan pa'i drung du yang 'o skol gyi bla ma gong ma'i gsung rab 'di tsho dar ba byung na/ sa skya pa'i bstan pa la khyad che bar gda' ste zhes zhus pas/ de bzhin cis kyang byed pas/ khyed kyis kyang bla ma gong ma'i dpe cha gang na ci 'dug gi rtsad gcod legs po gyis shig gsung / khong pa rang gis sngar lo dpe rdor bsod kyi TI ka'i steng nas brtag gnyis la thugs sbyongs mdzad pa/ phyis dag ldan la bsgyur ba sogs bla ma gong ma'i gsung rab la gzigs rtogs legs po mdzad nas bshad nyan gyis gtan la phab cing / dag ldan kha bskong la sogs pa'i yig cha bzang po yang mdzad nas/ sa skya pa'i dge