[A:503]ba'i bshes gnyen mang po la gsungs pas/ thams cad la yang thugs skyed chen po byung la/ khyad par du yang chos rje 'di nyid de dus gsan mkhan rnams kyi nang nas/ sku na gzhon shos yin kyang / lhag par thugs bskyed che zhing tshig don thams cad la phul du phyin par thag chod pa yin no/ /rje'i zhal snga nas kyang gong ma'i gsung rab kyi dpe cha'i rtsad gcod la thugs rtsol legs po mdzad nas/ dpe cha 'ga' re chos rje ye shes rgyal mtshan pa la yang gzigs pa phul/ chos rje pa rang gis gzigs rtog mthar phyin par mdzad pas gong ma'i gsung rab kyi dgongs pa dpyis phyin par thugs su chud de/ bla ma gong ma rnams kyi grub mtha' dang / gsung rab kyi rnam grangs rnams shin tu phra mo tshun chad kyang thugs la 'dzin par bzhugs pa yin no/ /yang skabs shig tu chos ldan seng ge bya ba rab byung gi cha lugs la spyod pa khrob se byas pa cig yod pa'i gos kyi mtha' sku lus la phog pa'i rkyen byas nas/ thugs mnal du mi phebs pa sdug bsngal chen po dang bcas pa'i khams 'dus drag po cig byung ba la/ chos rje ye shes rgyal mtshan pa yang dgon na bzhugs pa'i drung du/ rje btsun sgrol ma lha bcu bdun ma'i dbang cig zhus pas/ khams 'dus pa de las grol nas spyir gsung rab dgongs 'grel dang bcas pa mtha' dag la thos bsam mthar phyin par byas te/ bstan pa dang sems can gyi don rgya chen po bya dgos pa'i thugs kyi go cha chen po dang / thos bsam la sogs pa byed pa la dka' tshegs ci yang med snyam pa'i thugs la gdengs chen po yang 'khrungs te/ bla brang shar na bzhugs pa'i phyag dpe mdo sde la chos rje sa paN gyis mchan btab pa la sogs pa pu sti drug brgya brgyad cu lhag tsam la gzigs rtog legs par mdzad/ sgo rum gyi phyag dpe rnams la gzigs rtog mdzad par dgongs pa'i tshe/ gzhi thog tu bdag chen kun rin pa'i drung du byon pas/ de na dpe cha zang zing