[A:504]phad bu gang 'dug pa la gzigs pas/ de'i nang na dpe cha mgo tshem cig 'dug pa/ sgo rum gyi phyag dpe'i dkar chag tu 'dug pa thugs dges te/ bdag chen gyi drung du/ bdag sgo rum gyi phyag dpe rnams la lta rtog tshar gcig byed 'dod lags pa/ sgo rum gyi dkon gnyer dang 'dris zab po med pas/ bdag chen gyi drung nas dkon gnyer la/ khong phyag dpe rnams lta rtog tshar gcig byed 'dod par 'dug pas/ sgo rum du blta na blta sa yod pa dang / gzhan du blta na dpe cha g.yar po gyis gsungs pa'i zhal da cig thugs rjes 'dzin par zhu zhes zhus pas/ de bzhin byas pas chog gi gsungs nas/ bdag chen gyi drung du dkon gnyer bos te/ de bzhin gyi zhal da gnang bas/ ji ltar dgongs pa ltar gyi g.yar po byung ste/ gu ge paNDi tas dgu rim zhes gsungs shing chos rje sa paN gyis phyag dpe khang du bshad/ pod grangs sum stong zin tsam lo gsum gyi bar du res sgo rum du byon nas gzigs/ res gzhan du dpe cha gdan drangs te gzigs nas/ gzigs rtog mthar phyin par mdzad pas spyi dang bye brag gi gsung rab kyi don la thugs skyed mtha' yas pa byung gsungs so/ /gzhan yang 'phags pa gzhon nu blo gros pa'i drung du/ hor dus kyi ta hun gyi chos gos ber thul/ gos yug gan rgya ma nyams pa sogs zhabs tog dang bsnyen bkur gyis shin tu mnyes par mdzad de/ rdo rje phreng ba'i dbang yongs su rdzogs pa/ phreng ba skor gsum gyi lung / kr-i ya sa mutstsha'i dbang / dkyil chog gi lung / gsang 'dus 'jam rdor/ gshin rje'i gshed dgra nag rwa lugs/ gdong drug rwa lugs/ 'jig byed ro langs brgyad skor rwa lugs/ 'jigs byed bcu gsum ma/ 'jigs byed lha zhe dgu ma/ gshed dmar lha lnga ma/ lha bcu gsum ma/ dgra nag zhang lugs/ phyag na rdo rje 'khor lo chen po rnams kyi dbang / slob dpon nag po