[A:511]buddha pa gnyis po gral la bzhugs/ de'i drung na rje nyid kyang bzhugs 'dug pa la/ chos rje buddha shrI'i zhal nas/ bla ma kun dga' bzang po 'dis rab byung bsnyen rdzogs zhu mkhan su byung thams cad la byin na/ ma 'ongs pa na de thams cad sangs rgyas kyi bstan pa dang mjal/ rab byung thob pa'i rten 'brel cig gda' ste/ khong shin tu dam par byed kyin 'dug gsungs/ chos rje ye shes rgyal mtshan gyi zhal nas kyang de ka gda' ste gsung / rje la spyan gzigs kyin 'dug pa cig byung / de'i ngang la mnal sad/ de man chod sku bsnyel ba dang / thugs de la gzhan thams cad bzhag nas rab byung bsnyen rdzogs zhus tshad la mdzad pas rje'i drung du bsnyen par rdzogs pa thob pa'i dge slong khri rwa can lhag cig gi mkhan po mdzad cing / de yang / bla ma sangs rgyas rgyal mtshan/ slob dpon legs rin/ rdo rje rgyal mtshan/ grub thob nam mkha' dpal bzang rnams kyis bsnyen rdzogs pa nam byung res kyi yi ger btab/ gting sor dril nas brtsis pas/ rgya yul du 'phags pa'i slob ma cig la bsnyen rdzogs pa mang du byung 'dug ste/ de las kyang lhag go /gzhan yang dge bsnyen dang dge tshul mtha' yas pa mdzad do/ /mdor na bod kyi dge ba'i bshes gnyen gcig la rab byung bsnyen rdzogs kyi mkhan po mdzad pa'i grangs chos rje rin po che 'di pa las mang ba ma byung ba yin no/ /byang chub sems dpa'i sdom pa yang gdul bya so so'i zhe 'dod kyis dbu ma lugs dang / sems tsam lugs kyi sems bskyed gang rung re zhu ba dang / gnyis ka zhu ba gang 'dod kyi sgo nas byang sems kyi sdom pa dang ldan par mdzad pa mtha' yas shing / dbu ma lugs kyi sems bskyed ni gang zag sdig can la yang byed par bshad pas sems can grangs med pa la sems bskyed kyi cho ga gnang zhing / sems tsam lugs ni/ byang sa dang /