[A:510]gnang nas rten 'brel bsgrigs pa dang / 'jam dbyangs shes rab rgya mtsho ba dang / rgyal tshab pa gdan sa pa gsum par lung bstan pa dang / rnal 'byor dbang phyug gi sprul pa'i gdan sa pa drug tsam dang / rje btsun gong ma lnga'i sprul pa'i gdan sa pa lnga tsam 'byung gsung pa sogs mtha' yas kyang re re nas brjod par ma nus so// //gsum pa gzhan don phrin las ji ltar mdzad pa'i tshul la/ sdom pa gsum gyi sgo nas 'gro ba rjes su bzung tshul/ pha rol gyi rgol ba ngan pa'i log rtog bzlog tshul/ sku gsung thugs kyi rten bzhengs tshul dang gsum/ dang po la rgya che ba sdom pa gsum gyi sgo nas 'gro ba rjes su bzung tshul/ zab pa dbang rgyud man ngag gi sgo nas gdul bya du ma smin par mdzad pa/ de dag la brten nas mkhas shing grub pa brnyes pa'i slob ma dang / bstan pa la phan pa'i sbyin bdag ji ltar byung ba'o/ /dang po la dgung lo bco lnga pa la khams pa'i grwa pa'i lag len khrid pa'i slob dpon mdzad pa nas brtsams te/ bstan pa dang sems can gyi don 'ba' zhig mdzad la/ de yang gdul bya'i bsam pa'i dbang gi khrid tshul gyi rnam pa sna tshogs pas khrid par mdzad mod/ 'on kyang gtso che ba'i dbang du byas na gdul bya rnams gzhi tshul khrims rnam par dag pa la bkod nas/ lam nyams len la sbyor bar mdzad pa yin la/ de la so sor thar pa'i dbang du byas na/ dang po sa skyar so sor thar pa'i rab byung bsnyen rdzogs kyi sdom pa thub nges kyi gang zag 'ga' re la gnang ba ma gtogs/ gang yin du mi gnang bas shin tu dam par mdzad pa la/ chu 'dus kyi tshe thog tu chos rje ye shes rgyal mtshan pa'i sku mdun du/ bslab bya phog pa cig nyes skyon du gyur nas/ rje'i drung du bslab skyor la byung ba yun ring ma gnang yang / nub gcig mtshan lam du bla brang shar gyi 'og min na chos rje ye shes rgyal mtshan pa dang / chos rje