[A:517]khrims rnam par dag pa la bkod nas/ nyams len gyi rim pa dpal ldan sa skya pa'i bla ma gong ma rnams kyi gsung rab gtso bor gyur pa'i chos kyi 'khor lo sna tshogs rgyun mi 'chad par bskor bar mdzad la/ de yang dgung lo bzhi bcu rtsa brgyad du phebs pa yan chad gtso cher gdan sa chen por bzhugs shing / gnas skabs su sa bzang dang / gzhan chos dbar gyi gnas gang 'thad du byon nas chos gsung pa ni/ phal che ba'i dbang du byas na/ chu 'dus/ gting khebs/ ri bo sgang / khro phu/ thar pa gling la sogs pa rnams su/ lam 'bras sogs khrid kyi rim pa/ rgyud 'bum sogs lung gi rim pa mang po/ bde kye gsang gsum sogs rgyud bshad kyi rim pa mang po/ dkyil chog mang po'i bshad pa dang phyag len/ rdul tshon la sogs pa'i dkyil 'khor mang po'i sgrub mchod/ dbang bka' dang byin rlabs/ rjes gnang mang po/ dge 'dun gyi sde 'dzugs pa/ gtsug lag khang sogs rten gsum bzhengs pa'i zhal bkod dang rab gnas la sogs pa bsam gyis mi khyab pa mdzad de/ de yang dbyar dgun gyi chos dus rgyud sde la sogs pa'i bshad pa dang / sgrub dkyil la sogs pa'i lag len gyi skor dang / gsung ngag la sogs pa khrid kyi rim pa sna tshogs gsung zhing / ston dpyid kyi dus su rdo rje phreng ba dang / zur dka'i rigs sna tshogs gang skabs su babs pa'i dbang bskur rnams zang zing med pa'i chos sbyin mdzad pas/ de la gtad nas phyogs ris kyi dge ba'i bshes gnyen rab tu mang po/ bla ma sa bzang pas dbang sbyin gnang gin yod pa zhu ba la 'gro zer zhing 'byon pa yin no/ /yang skabs shig shAka bzang sku 'bum du lo bdun tsam 'jig rten gyi bya ba'i phyogs gang gi'ang spros pa'i mtshams bcad nas chu shing 'tsho ba'i rgyun tsam len pa'i sgo chung mdzad cing / /chos kho na don gnyer gyi gdul bya yod na nang du gtong