[A:518]zhing gzhan gang yang mi gtong par bshad sgrub la chig dril mdzad pa yin gsung ngo / /de lta bus mtshon nas chos gang gsungs kyang bstan pa 'ba' zhig la dgongs nas/ sku srog blos gtang ste zang zing med pa'i chos sbyin kho na mdzad de/ shAka bzang sku 'bum du sngon gyi dus su gsung ngag zhu ba la longs spyod mang po 'bul dgos pa'i lo rgyus cig byung ba'i tshe/ rje'i zhal nas/ sngon gyi dus na bstan pa yar so'i dus su song bas gdul bya rnams chos don gnyer dka' spyad dang / longs spyod gtong phod che bas gdul bya'i rgyud la rten 'brel khyad par can bsgrigs pa'i ched du sngon gyi bla ma rnams kyis longs spyod mang po 'bul bzhes mdzad pa yin la/ deng sang bstan pa 'gribs nas gsung ngag la sogs pa'i bka' chad la khad du song 'dug pas/ gdul bya snod ldan byung na/ gsung ngag dang dbang la sogs pas gdal gtod lta bu byas nas kyang bstan pa'i rgyun la phan du re byed dgos pa'i dus su song 'dug pa gsung ngo / /gzhan yang skabs su rgyud 'bum dang sa skya bka' 'bum la sogs pa'i lung rnams gsung ngo / /skabs shig tu shAka bzang sku 'bum du bde mchog rtsa rgyud cig gsungs pa'i chos tshugs nas zhag mang rab song ba dang / 'dar ba'i dge bshes mkhan chen shAka 'od pa dpon slob gnyis byon nas/ rgyud kyi bshad pa gnang dgos zhus pas rgyud la dum bu byas na mi dga' bas da len mi 'ong zhes zhal da nan cher gnang yang ma gsan par rgyud bshad pa dang / rgyud ma rdzogs par khong dpon slob glo bur du 'byon dgos par byung nas/ rgyud bcad pas/ chos rje'i sku khams log nas 'o brgyal po byung ba dang / nub gcig mnal du bud med sngo dmar bzhi byung nas khyed kyis bla brang shar pa'i bde mchog gi sku bshas nas btsongs zhes zer nas ma mnyes pa'i tshul mang po ston pa byung ba la/ nged kyis bla brang shar pa'i bde mchog gi sku bshas pa med/ bla brang shar pa