[A:558]mya ngan gyi cha lugs byed pa la sogs pa chos dang shin tu mi mthun pas/ de lta bu'i rigs gcig kyang ma byed gsungs pa la sogs pa'i zhal da rab tu zhib pa mtha' chod par gnang 'dug /de dag gi skabs su nam mkha' la 'ja'i bye brag sna tshogs ni rgyun du byung zhing / khyad par sa ga zla ba'i tshes bcu bzhi dang bco lnga la/ 'ja' kha dog dang dbyibs sna tshogs pa bsam gyis mi khyab pa byung ba dang / me tog sna tshogs kyi char 'bab pa/ ri ngur ba/ 'od chen po lung pa'i phu mthar 'gro ba/ nam mkha' la rol mo'i sgra mang po sgrogs pa/ dgon gnas thams cad dri bzang pos khyab pa la sogs pa ngo mtshar ba'i ltas du ma dag byung bas skye bo phal mo ches/ de'i zhag phyi rol gyi rtags la dpags nas chos rje ngor pa tshes bcu bzhi'am bco lnga gang rung la bde bar gshegs so zhes sgrogs pa byung ngo / /de'i tshe rje'i zhal nas chos rje shar pa tshes bcu la bde bar gshegs pa yin/ slob dpon dkon rgyal ba yun ring zhes yang yang gsungs/ nang du yang mnal lam la sogs pa dag pa'i snang ba'i gzigs snang sna tshogs byung bar snang ste/ nub gcig mnal lam du rje btsun rin po che grags pa rgyal mtshan gyi sku gcig 'gyel nas kha bub tu bzhugs 'dug pa/ rje rang yang de nyid yin snyam pa cig la mi mang po zhig na re/ da 'di bslang ran 'dug slongs zer nas slong gin 'dug pas langs pa na/ 'jam rdor gyi gser sku lta bu gser kha shin tu legs shing dwangs pa 'od zer 'phro ba dang bcas pa zhal gsum phyag drug la phyag mtshan 'di yin mi gsal ba cig tu gyur pa'i rgyab kyi pad gdan nas mthe bong tsam cig ma tshang ba de 'dra ba c-ig byung ba rmis/ langs pa de cung zad dga' ba srid de 'on kyang gzugs 'gyur byung bas ci 'dra 'ong ngam zhes gsungs/ yang nub gcig srod la chen po kun bsod pa dang / bla ma dpal