[A:565]po'i rnam par thar pa rgya mtsho lta bu las chu thigs tsam cig blangs nas lam 'bras bla ma brgyud pa'i rnam thar gyi kha skong du rje nyid la mi phyed pa'i dad pa dang ldan pa'i bshes gnyen du mas bka' gnang ba'i ngor/ slob 'bangs kyi tha chung dkon mchog rgyal mtshan gyis me mo glang gi lo gro bzhin gyi zla ba'i tshes bco lnga la dpal e waM chos ldan gyi gtsug lag khang du bris pa'o zhes gsungs/ de dus kyi yi ge pa ni grub chen srad pa kun blo yin par snang ngo / /de ltar gzugs kyi sku de nyid chos kyi dbyings su bsdus kyang / bla ma nyid kyi thugs rje'i phrin las kyi sku'i bkod pa sna tshogs kyi 'khor lo ni rgyun mi 'chad pa nyid do/ /de skad du mkhas pa kun blos/ rjes su gdan sa phyi nang rten bzhengs sogs/ /phan tshun rtsod bral 'bad med lhun gyis grub/ /phrin las rgyun gyi mdzad pa sa skya pa/ /dpal ldan sa skya pa la gsol ba 'debs/ /sa skya pa yi gzhung lugs mtha' dag dang / /rje yi gsung rab rdzogs par sus shes nus/ /rang gis gang thos gang la sbyangs pa rnams/ /chos dang rang sems 'dres par byin gyis rlobs/ /zhes gsungs pa ltar te/ phyogs thams cad du bu slob sbyin bdag rnams kyis dgongs rdzogs mdzad pa yang bsam gyis mi khyab ste/ dper mtshon na mdo khams pa bla ma sangs rgyas rgyal mtshan gyis kyang thos mchod rgyas pa dang / bsam grub dpal 'bar/ chos gling la sogs pa'i chos sde rnams su mang ja gral 'gyed dang bcas pa dang / glang lo zla ba gsum pa sangs rgyas dbang bskur ba'i dus chen nag pa zla ba la ri mgo dgon par bde kye gsang gsum gyi rgyud nas gsungs pa'i ngor lugs dkyil 'khor lnga'i sgrub mchod sa chog nas brtsams te dkyil 'khor rdul tshon ma'i steng nas rig pa 'dzin pa bcu phrag brgyad kyis tshes bcu gnyis nas bzung te/ nyer drug gi bar du legs par bsgrubs pa de lta bu'i mtshon