[A:༥༥བ] ཚ་ཐོག་དགོན་པར་བྱོན་པའི་ཞོར་ལ། ཇོ་བོ་སྙེ་ཐང་ན་མོ་ཆེར་བཞུགས་པ་དང་མཇལ་ཏེ། སེམས་སྐྱེད་གསུང་པ་གསན། དེའི་དུས་སྤྱི་བོར་ཕྱག་གཞག། སཾསྐྲྀ་ཏའི་སྐད་དུ་བཀྲ་ཤིས་ཀྱི་ཚིག་བཅད་མང་པོ་མཛད། གསེར་གླིང་པའི་བུམ་པ་པདྨའི་མཆུ་ཅན་གནང། ངའི་ཆོས་བརྒྱུད་འཛིན་པ་ཞིག་འོང་གསུང། དེ་ནས་ལན་ཚ་རབ་དང། རྒྱུག་པར་སྡེ་སྣོད་ཀྱི་གསན་སྦྱོང་མང་དུ་མཛད། རྒྱ་གར་རྡོ་རྗེ་གདན་ཆོས་ཀྱི་འབྱུང་ཁུངས་ཡིན་པས་དེར་འབྱོན་དགོས་དགོངས་ཏེ། ལོ་ཙཱ་དང་རྒྱ་ཡིག་མང་དུ་བསླབས། དེའི་ཚེ་ཡུམ་རྒྱུག་པར་བྱོན་ནས། འདི་རྣམས་ཕལ་ཆེར་དགྲ་འདྲེས་གཙེར་བ་དང། ལྟོ་དོན་དུ་གཉེར་བ་ཤ་སྟག་ཡིན། ཆོས་བྱ་སམས་བསམས་ནས་རབ་ཏུ་བྱུང་བ་ནི་ཁྱོད་དང་ཞ་བཙུན་གཉིས་ཡིན། སྙིང་ནས་ཆོས་བྱེད་ན་ར་སྒྲེང་དུ་འདེང་ཟེར་ནས། ཡུམ་གྱིས་ཁྲིད་དེ་དགུང་ལོ་ཉེར་དྲུག་ལ་འབྲོམ་སྟོན་པ་དང་མཇལ། སྤྱན་སྔའི་ཞལ་ནས། ངའི་མ་རང་བཞིན་གྱི་རྣལ་འབྱོར་མ་ཡིན་པས། འདིར་བསྐྱལ་བ་ཡིན་གསུང། རྒྱ་གར་དུ་འགྲོ་བའི་ཆོས་འདྲ་ཞུས་པས། སྟོན་པའི་ཞལ་ནས། ཁྱོད་རྡོ་རྗེ་གདན་དུ་མ་འགྲོ། ངས་རྗེས་སུ་འཛིན་པ་ཡིན། ཚེས་གྲངས་འདི་ལ་ལམ་རིམ་གྱི་དབུ་འཛུགས་གསུང་སྟེ་བྱོན། ཉི་མ་ཤར་བ་དང་འཛོམ་པས་རྟེན་འབྲེལ་བཟང་གསུང་སྟེ། ལམ་རིམ་ཁྲིད་པས་ཇི་ལྟར་བ་བཞིན་ཐུགས་ལ་འཁྲུངས། སྐུ་མཆེད་གཞན་གཉིས་དང་དཔེ་གཅིག་ལ་ཕུ་ཆུང་བ་དབུས་སུ་བྱས་ཏེ་གཞུང་གི་བཤད་པ་གསན། སྤྱན་སྔའི་ཞལ་ནས། ཟིན་ངེས་པ་རེ་ལའང་ལན་གསུམ་གསུམ་སྟོན་པའི་སྤྱན་སྔར་བསྐྱར་ནས་ཤོག་གུ་དམར་པོ་ལ་བྲིས་ཡོད་གསུང། ནུབ་གཅིག་རྣལ་ལམ་དུ་རྡོ་རྗེ་གདན་དུ་བྱོན་པ་