[A:༢༧བ] པཎྜི་ཏ་གདན་འདྲེན་པའི་འཕྲོ་བཤོལ། ངའི་བསྟན་པ་ལ་ཞུགས། ཡང་ན་གསེར་རྒྱལ་པོ་རང་དང་མཉམ་པ་ཁྱེར་ལ་ཤོག། དེ་ནས་བཏང་གི་ཟེར་བས། གསེར་ལ་འདམས་ནས། ལུས་དང་མཉམ་པས་བླུས་ཀྱང་མ་ཉན་དེ་ནས་ཁུ་བོ་ལ། ད་ངས་དབུ་ཙམ་ཞིག་རྙེད་པ་དང་བླུར་འོང་གི་ཞུས་པས། བཞད་ལོ་གཅིག་མཛད་ནས་ད་དེས་ཆོག། ངའི་བསམ་པ་ལ། བོད་འདིར་ཆོས་ཁྲིམས་ཤིག་མ་འཆོས་པར་ཤི་ན་མི་རུང་སྙམ་པ་ཡིན་ཏེ། ད་ན་སོ་ཡང་རྒས། འཁོར་བ་ཐོག་མེད་ནས་ཆོས་ཀྱི་ཕྱིར་ལུས་བཏང་བ་མེད། ད་ལན་ཆོས་ཀྱི་ཕྱིར་ཤི་ན་ལེགས་པ་ཡིན་བས། སྡིག་རྒྱལ་འདི་ལ་གསེར་སེ་བ་གཅིག་ཀྱང་མ་སྟེར། གསེར་ཐམས་ཅད་རྒྱ་གར་དུ་ཁྱེར་ལ། ད་དུང་ཨ་ཏི་ཤ་གདན་ཅི་འདྲོངས་དྲོངས་གྱིས། པཎྜི་ཏ་ཆེན་པོའི་སྙན་དུ་ཡང། ངས་ཁྱེད་དང་སངས་རྒྱས་ཀྱི་བསྟན་པའི་ཕྱིར་དུ་ལུས་སྲོག་གར་ལོག་གི་རྒྱལ་པོ་ངན་པ་ལ་བྱིན་ཡོད་པས་ཁོ་ཚེ་རབས་ཐམས་ཅད་དུ་བདག་ཐུགས་རྗེས་འཛིན་པ་དང། ངའི་བསམ་པའི་གཙོ་བོ་ཁྱོད་བོད་དུ་བྱོན་ནས་སངས་རྒྱས་ཀྱི་བསྟན་པ་དར་བར་བྱེད་པ་ཡིན་པས། དེ་ཁོ་ན་བཞིན་དུ་མཛད་པར་ཞུ། སྐྱེ་བ་འདིའི་འོག་རོལ་དུ་ཁྱེད་དང་ངེས་པར་མཇལ་བར་བྱིན་གྱིས་བརླབ་ཏུ་གསོལ། ཞེས་ངའི་འཕྲིན་མཛོད་ཅིག། དེ་ལྟར་ལགས་པས་ང་བློས་ཐོངས་ལ། སངས་རྒྱས་ཀྱི་བསྟན་པ་ལ་སོམས་ཤིག་གསུང། དེ་ནས་ཁུ་བོ་གར་ལོག་གི་རྒྱལ་པོས་མེད་པར་བྱས་པས། གཏམ་དེ་རྣམས་མགོན་པོ་ཨ་ཏི་ཤའི་སྙན་དུ་ཐོངས། ངེད་བོད་མཐའ་མཁོབ་ཀྱི་སེམས་ཅན་མ་རིག་པ་རྣམསཀྱི་སྙིང་སྟོབས་དེ་འདྲ་ན། ཁྱེད་འགྲོ་བའི་སྐྱབས་གནས་ཐུགས་རྗེ་ཅན་ཇི་ལྟར་སོང་ཞེས་ཞུས་ཤིག། འདི་ན་གསེར་སྲང་བདུན་བརྒྱ་ཡོད་པ་བླ་མའི་ཕྱག་ཏུ་ཕུལ། ངེད་བོད་པྲེ་ཏ་པུ་རིའི་གྲོང་ཁྱེར་ལྟ་བུ་ན་གསེར་སེ་བ་རེ་ཙམ་ལའང་རྩིས་ཆེན་པོ་ཡོད་ལ། ད་འདིས་བདག་
ཅག་གི་
མི་ནོར་