[A:༣༠བ] ཉམས་ན་སེམས་ཅན་སྤྱིའི་བདེ་སྐྱིད་ཉམས་འགྲོ་བ་ཡིན་མོད། དེའི་རྒྱུ་མཚན། རྒྱ་གར་གྱི་ཆོས་སྲོལ་དང། གཙུག་ལག་ཁང་ཐམས་ཅད་ཀྱི་ལྡེ་མིག་ཨ་ཏི་ཤའི་ཕྱག་ན་ཡོད་པ་ཡིན། དེ་མིན་ན་ངེད་ཀྱང་བོད་ཀྱི་སེམས་ཅན་ལ་སེམས་བརྩེ་ཞིང། ཁྱད་པར་དུ་བོད་ཀྱི་ཆོས་རྒྱལ་དེའི་མི་ནོར་མང་པོ་ཟད་པས་ངོ་མནོང་སྟེ། སངས་རྒྱས་ཀྱི་བསྟན་པ་ལ་བབས་པ་ཡིན་པས། དེ་སོམས་ལ་བརྩོན་འགྲུས་དྲག་པོས་བསྟན་པ་རབ་འབྱམ་ལ་སློབ་གཉེར་གྱིས། ངས་ཀྱང་ཚིག་སུ་ཅི་འགྲོ་བྱེད། ཁྱེད་བོད་རྒྱ་གར་བ་ལ་འདི་ལྟར་སེམས་པ་ངོ་མཚར་ཆེ་ཞེས་གསུང། དེ་ནས་གནས་བརྟན་གྱིས་ཁྲིད་དེ་དགེ་འདུན་གྱི་གདུགས་ཚོད་གྲལ་དུ་ཕྱིན། ཨ་ཏི་ཤ་གྲལ་གྱི་དབུ་ལ་བཞུགས་སམ་སྙམ་པ་ལ། ཤཱནྟི་པ་བཞུགས་འདུག་པ་ལ། འདི་ཨ་ཏི་ཤ་ལགས་སམ་བྱས་པས། ཚེ་དང་ལྡན་པ་འདི་ནི་ཤཱནྟི་པ་ཞེས་བྱ་བ། མཁས་གྲུབ་ཆེན་པོ་ཨ་ཏི་ཤའི་ཡང་བླ་མ་དེ་ལགས་མོད་ཟེར། དེ་ལྟར་རྗེ་བཙུན་ནཱ་རོ་པ་ལ་སོགས་པ་གྲལ་གྱི་དབུ་ལ་འདུག་པ་ལ་རེ་རེ་བཞིན་འདི་ཨ་ཏི་ཤ་ཡིན་ནམ་ཞེས་དྲིས་པས། འདི་ནཱ་རོ་པ་ཞེས་པ་དིང་སང་འགྲན་ཟླ་དང་བྲལ་བ་ཨ་ཏི་ཤའི་ཡང་བླ་མ་ཡིན་ཟེར། གཞན་དུ་ཨ་ཏི་ཤ་མ་མཐོང་བས་ཡིད་ཞུམ་པ་ན། དུས་རེ་ཤིག་ཞིག་བི་ཀྲ་མ་ལའི་རྒྱལ་པོ་ཁྲི་བཤམས་པའི་སྟེང་ན་འདུག་པ། པཎྜི་ཏ་ཆེ་ཆུང་གང་ལའང་ལྡང་བ་མི་བྱེད་པར་སྣང་བ་ལ། ཨ་ཏི་ཤ་སྐུ་བཟི་བརྗིད་ཆེ་ཞིང། ཞལ་འཛུམ་ཆགས་པ། ཅམ་པོར་གཤེགས་པ་གཅིག་ནང་དུ་བྱོན་པ་དང། རྒྱལ་པོ་དེས་ཁྲི་ལས་ལངས་པས། པཎྜི་ཏ་དང་དགེ་འདུན་ཐམས་ཅད་ཀྱིས་ལྡང་བ་བྱས། གྲལ་སྟོང་དུ་བཞུགས་པ། མཐོ་བས་འདི་ཨ་ཏི་ཤ་ཡིན་ནམ་དྲིས་པས། ཅི་ཟེར་འད་དཔའ་བོ་བཞད་པའི་རྡོ་རྗེ་ཞེས་པ་གནས་ངེས་མེད་དུ་