[A:65b] spyan snga ba gshegs pas/ bzhi brgya'i tshab tu dgung lo don gsum pa la lam pa'i gtsug lag khang gi rmang bting ste rdzogs par grub/ sku gsung thugs kyi rten snga phyir dpag tu med pa bzhengs pa'i grags che ba/ rab gnas kyi dus su spyan snga ba la chos gsungs pa'i/ 'jam dpal dpa' bo'i sku la sogs pa rgyud sbyangs ma bdun dang/ rnal 'byor pas rab gnas mdzad pa spo to'i gsung 'byon/ mkha' ru'i ljang skyes/ btsan gro'i chu khol zhes rten rtags thon gsum du grags pa'i thub pa chu khol sogs mang du bzhengs/ spyan dang mngon bar shes pa mnga'/ yi dam mang po zhal gzigs/ bden gnyis kyi rtogs pa thugs la 'khrungs/ 'gro don rgya cher mdzad de/ slob ma rtogs ldan sdings mo ba gnubs chos 'bar/ dge bshes lha bzo khyung khams po che/ glog skya/ dge bshes zar pa/ bya 'dul 'dzin/ dge bshes gnas brtan la sogs pa rtogs pa dang/ gzhan phan la mnga' brnyes pa mang du byon te/ lo brgyus rgyus cung zad 'og tu 'chad do/ de nas stod lungs pa dge bshes lha bzo la gdan sa gtod dgongs pa la/ lha bzos mngon shes kyis rig nas gram rda chad skad sar bzhugs pas glen pa lha bzo de byung na bslab bya 'dra bya rgyu yod pa yin te ma byung/ da dge bshes glog skya dang/ zar pa gnyis kyis 'di dang mal gro zar gnyis spyi la bskyongs gsung/ der yod pa rnams kyis rjes su rten bzhengs sogs ji ltar byed zhus pas/ spur 'di g.ya' phu rgyu'i rtse la bskyol/ rten ma bzhengs gsung/ 'o na sprul sku bya yul ba rten bzhengs pa 'dug na/ ji ltar byed zhus pas/ nga khong la drin che ba yin/ lo bdun 'gro ba nas bskyangs/ bla ma spyan snga rnal 'byor pa lta bu la sprad/