[A:41b]pa dang sgrub pa'i chos/ don tha dad du 'dzin pa dang/ sdom pa gsum 'gal bar bsams nas tshul khrims kyi bslab pa khyad du gsod pa dang/ lam phyogs re pas thar pa thob par 'dod pa rnams 'gog pa la/ dpal ldan a ti sha nyid kha ba can pa thams cad la bka' drin che ba yin te/ rgyal ba'i gsung rab thams cad kyi gnad bsdus pa/ shing rta chen po klu sgrub dang/ thogs med gnyis kyi lam srol/ rnam pa thams cad mkhyen pa'i sar 'gro ba'i skye bo mchog gi chos lugs/ skyes bu gsum gyis nyams su blang ba'i rim pa ma tshang ba med par bsdus pa/ byang chub lam gyi sgron me'i sgo nas skal ba dang ldan pa rnams rim gyis sangs rgyas kyi sar 'khrid pa'i lam ma nor ba gsal bar mdzad pas bka' drin che ba yin / de yang spyir rgyal ba'i lung gi bstan pa thams cad sde snod gsum du 'du bas/ rtogs pa'i bstan pa yang bslab pa gsum du 'du la/ tshul khrims kyi bslab pa ni ting nge 'dzin gyi bslab pa sogs yon tan thams cad kyi rten du gsungs shing/ ting nge 'dzin dang shes rab kyi bslab pa ni/ byang chub mchog tu sems bskyed nas pha rol du phyin pa drug la gtso bor bslab pa thun mong ba'i lam dngos yin zhing/ rdo rje theg pa nyams su len pa rnams kyis kyang/ dbang bskur rnam dag thob nas dam tshig dang sdom pa bsrung ba/ skyed rdzogs nyams su len pa rnams thabs kyi cha nas khyad che ba yang/ bslab pa gsum du ma 'dus pa med pas/ bstan pa thams cad 'gal med du gsal bar mdzad do/ de lta bu'i lam gyi rnam gzhag dang mi ldan na/ lam gyi go rim/ grangs nges/ ngo bo rnams/ shing rta chen po rnams kyis gsungs pa dang mi mthun cing/ rgyal bas gsungs pa'i lam du mi 'gyur bas/ 'bras bu rdzogs pa'i sangs rgyas kyang 'byung dka' bar gsungs so/ de lta bu'i bla ma yon tan rgya mtsho lta bu mnga' ba de'i rnam thar