[A:42a] sangs rgyas dang byang chub sems dpa' rnams kyi yul du gyur pa/ bdag lta bu blo dman pa dag gi yul ma yin zhing/ ye ge nyung ngu dag gis rtogs par dka' la/ mthong tshad tsam zhig bris na'ang mang bas/ rnam thar rgyas pa don du gnyer na gdul bya thun mong ba'i blo dang bstun pa lam yig tu gsungs pa dang/ de las blo mtho ba la braM ze be tA ri/ byang chub bzang po/ rig pa'i khu byug/ a ba dhU tI pa/ rA hu la gupta rnams bsten tshul la bla ma lnga pa dang/ de'i steng du thar par gshegs nas bla ma gser gling pa/ shAnti la sogs bdun bsten tshul dang/ bla ma bcu gnyis pa dang/ yi dam gyi lhas lung bstan pa dngos grub kyi 'od zer dang/ dam pa chos kyi 'byung gnas chung ba dang/ chos kyi 'byung gnas che ba gsang skor du grags pa rnams ston pas mdzad pa dang/ de rnams dang phyogs mthun pa lo tsA bas bstod pa brgyad bcu pa dang/ thun mong ma yin pa rnams bka' gdams glegs bam du skyes rabs nyi shu rtsa gnyis gsungs pa/ jo bo yab sras gnyis ka'i rnam thar shugs la rgyas par 'byung ba rnams su shes par bya'o/ de ltar skal ba dang ldan pa rnams la mdo sngags kyi gzhung gdams ngag ma lus pa bstan nas/ bstan pa'i srol nub pa rnams gsar du gtsugs/ srol cung zad yod pa rnams 'phel bar mdzad/ log par rtog pa'i dri mas sbags pa rnams legs par bsal te/ bstan pa rin po che dar zhing rgyas par mdzad nas/ dgung lo don gsum pa shing pho rta'i dbyug gu zla ba'i tshes nyi shur lam yig las gsungs kyang/ ston pa'i gsung gi gral tshes bcu bco brgyad la byon par bzhed de/ dga'