[A:135]gdan sa bka' gros pa rnams kyis kyang / rnam rgyal/ sgrol ma/ mtshan brjod 'bum ther/ gsung rab klog pa/ mgon po'i mchod gtor/ bskang gso la sogs pa legs par bsgrubs shing / sku rim la dmigs pa'i mdos chen gcig bsgrub par zhus pa na/ de bzhin byas pas yong / nga la phan pa cher med na'ang / sde 'di la phan par 'dug gis gsung zhing / bka' gros pa rnams kyis kyang de bzhin du mdos chen gyi sku rim btsugs/ de dag gi gnas skabs thams cad du rje 'di nyid ni sngar las thugs bde nyams che zhing dgyes tshor dang bcas pa'i ngang nas/ nang du zag med kyi dga' bzhi'i ye shes thugs rgyud la 'khrungs pa rtags su ha ha hi hi la sogs pa'i bzhad pa'i nyams mnan pas mi non pa phyi rol rgyang ring po nas thos pa dang / srod tho rangs kyi dus su chos skyong gi bstod pa'i dbyangs shugs 'byung du lan mang po mdzad pa sogs/ bla ma yi dam mkha' 'gro chos skyong sogs dag pa'i gzigs snang mang pos dus 'da' bar snang zhing / lhag par lan cig gi tshe yun ring po zhig spyan nam mkha' la ce re gzigs shing / 'o mi rnams kyis nga la kho chos kyi rgyal po la mi mos zer de e bden par 'dug /chos kyi rgyal po nga la thugs rjes 'dzin par nges/ da lta rang rje btsun chen po dang / chos kyi rgyal po dang rje btsun 'jam dbyangs chen po rnams sku 'od mer re nam mkha'i mthongs na bzhugs 'dug gsung ba dang / yang tsha mda' nas kyi 'tsho byed cig la sogs pa phyags phyi ba 'ga' re sku drung na yod pa'i dus su/ nub phyogs pha ki na 'od skya