[A:48] lam sna zin pa dang ting nge 'dzin la rtogs pa thob pa'i sbas pa'i rnal 'byor brgyad cu tsam byung / gzhan yang che bar grags pa dpal chen rga lo/ khams pa a seng / byang sems zla ba rgyal mtshan/ 'gro mgon phag mo gru pa/ gshen rdor seng / ne tshe sbas ston la sogs kyang zhabs kyi padmar 'dud cing / gsung gi gsang ba rna ba'i rgyan du 'dzin par byed do/ /dam pa 'di la gdung gi sras bzhi 'khrungs pa'i che ba kun dga' 'bar chung ngu la rgya gar du byon pas mkhas pa chen por gyur na'ang bod du byon khar tshad pa'i bsnyung gzhis rdo rje gdan nyid du gshegs/ gnyis pa grub chen mi thub zla ba'i rnam 'phrul slob dpon rin po che bsod nams rtse mo/ rgya gar chu bo ganggA tshun chad la 'gran zla bral ba'i mkhas pa chen por gyur cing / bstan pa dang sems can gyi don rgya chen po mdzad/ gsum pa rje btsun rin po che grags pa rgyal mtshan 'phags yul du sgo mtha' yas pa'i blo gros la sogs pa'i paNDi ta du mar skye ba bzhes shing / rje btsun 'jam pa'i dbyangs kyis skye ba bdun gyi bar du rjes su bzung ba'i mthar la stod gcung du rdog ston bhu gu ba zhes par skye ba bzhes pa'i rjes su 'di nyid du 'khrungs pas shes bya rab 'byams la blo'i snang ba thob cing rdo rje theg pa'i gsang ba mtha' dag gi bang mdzod chen po/ kha che paNDi ta la sogs pa 'phags yul gyi mkhas pa rnams kyi nga rgyal kyang gcog par nus pa/ rdo rje dril bu nam mkha' la 'jog cing / mgon po lcam dral dang / lha klu sde brgyad la sogs pa bran du 'khol nus pa'i mthu stobs kyi mnga' bdag chen por ni yongs su grags pa yin/ sras bzhi pa dpal chen 'od po zhes